संस्कृति पर्यटन तथा नागरिक उड्डयन मन्त्रालयका सचिव एवं निगम संचालक समितिका अध्यक्ष शंकरप्रसाद अधिकारीले शुक्रबार र्‍याम्प बस सेवाको उद्घाटन गरेका छन् । नेपाल वायुसेवा निगमले ग्राउण्ड ह्याण्डलिङ सेवालाई स्तरीय बनाउनुका साथै यात्रुहरुलाई सुविधा दिने उद्देश्यले थप २ वटा र्‍याम्प बसबाट सेवा प्रारम्भ गरेको हो ।

सो अवसरमा निगमका महाप्रवन्धक सुगतरत्न कंसाकारले ग्राउण्ड ह्याण्डलिङ सेवामा थप सुधार गर्न आधुनिक प्रविधिको प्रयोग गर्दै जाने जानकारी गराए ।

त्रिभुवन अन्तर्राष्ट्रिय विमानस्थलको प्रस्थान कक्षबाट विमानसम्म र विमानबाट निर्गमन कक्षसम्म यात्रुहरुलाई आवागमन गर्नमा यी बस प्रयोग गरिनेछन् । एकपटकमा ११० जना यात्रुलाई सेवा दिन सक्ने उल्लिखित बसहरु आधुनिक सुविधासम्पन्न रहेको निगमले जनाएको छ । जर्मनीको कोवस बेस्वाडेन कम्पनीको उत्पादन ती बसहरु निगमले माटर ट्रेडिङ कम्पनी काठमाडौंमार्फत प्राप्त गरेको हो ।

ग्राउण्ड ह्याण्डलिङ सेवा निगमले राम्रो रुपमा संचालन गरेको कुरालाई कदर गर्दै आइकाओले ‘आइसागो’ प्रमाणपत्र प्रदान गरेको छ भने यी बस संचालनमा ल्याएपछि अझ स्तरीय सेवा दिन सकिने निगमको दाबी छ ।