नेपाल विद्युत प्राधिकरणले काठमाडौं उपत्यकामा विद्युत वितरण प्रणालीलाई भुमिगत गर्न आइतबार विश्वव्यापी बोलपत्र (ग्लोबल टेण्डर) को आब्हान गरेको छ ।
भूमितगत लाइनबाट विद्युत वितरण गर्न विद्युत प्राधिकरणले पहिलो चरणमा उत्तरी क्षेत्र महाराजगञ्ज वितरण केन्द्रका लागि बोलपत्र (ग्लोबल टेण्डर) को आब्हान गरेको हो ।
रत्नपार्क वितरण केन्द्रमा पनि वितरण प्रणाली भुमिगत गर्न छिट्टै ग्लोबल टेण्डरको आब्हान गर्न लागेको प्राधिकरण आयोजना व्यवस्थापन निर्देशनालयका प्रमुख मनोज सिलवालले बताए ।
प्राधिकरणले असोज ४ गते अर्थात सेप्टेम्बर २० तारिखलाई बोलपत्र पेश गर्ने अन्तिम मिति तोकेको छ । बोलपत्रदाताले भूमिगत वितरण प्रणालीको खाका (डिजाइन) सामान आपूर्ति, जडान र सञ्चालन गर्नुपर्ने बोलपत्रमा उल्लेख छ ।
पहिलो चरणमा महाराजगञ्ज र रत्नपार्क वितरण केन्द्रका मुख्य सडकमा ११ केभी र ४ सय भोल्टका प्रणालीलाई भुमिगत र आधुनिकीकरण (अटोमेसन) गरिने सिलवालले जानकारी दिए ।
उनका अनुसार वितरण प्रणालीलाई भुमिगत गर्नुका साथै अप्टिकल फाइबर बिच्छ्याउने र बिजुली वितरणको तथ्याँक राख्न बेग्लै केन्द्र, दुई वितरण केन्द्रमा ९० हजार थान आधुनिक (स्र्माट मिटर) जडान गरिने योजना रहेको उनले सुनाए ।
भुमिगत प्रणाली जडान भएपछि विद्युत वितरण अझ बढी प्रभावकारी हुने अनुमान गरिएको छ । पहिलो चरणमा २ वटा वितरण केन्द्रका अतिरिक्त काठमाडौं उपत्यकाका ९ वटै वितरण केन्द्रमा भूमिगत गर्ने र दोस्रो चरणमा अन्य महानगरपालिका र उपमहानगरपालिकामा भूमिगत लाइनलाई आधुनिकीकरण र स्मार्ट मिटर जडान गर्ने योजना रहेको सिलवालले सुनाए ।
यो आयोजना एसियाली विकास बैंक (एडीबी) को ऋण सहयोगमा विद्युत प्रसारण तथा वितरण क्षमता अभिवृद्धि योजनामार्फत भुमिगत गर्न लागेको हो । यसमा एडीबीले १५ अर्ब रुपैयाँ बढी (१५ करोड अमेरिकी डलर) ऋण दिन सहमति जनाएको छ । यद्यपी ऋण सम्झौता हुन भने बाँकी रहेको उनले बताए । एडीबीसँग छिट्टै ऋण सम्झौता हुने उनको भनाई छ ।
बाहिरी प्रणालीबाट विद्युत वितरण गर्दा जोखिम हुन सक्ने, मानविय क्षतिका साथै सहरको सौन्दर्यमा ह्रास आएको भन्दै प्राधिकरणले यसलाई भूमिगत गर्न लागेको हो । विकसित मुलुकमा विद्युत वितरण प्रणाली भूमिगत रहेको छ ।
प्रतिक्रिया