पुरुषहरूमा शुक्राणुको सङ्ख्या (स्पर्म काउन्ट) कम हुने हालको गति जारी रहे यसले एकदिन पृथ्वीबाट मानव जातिको अस्तित्व नै मेटाइदिने खतरा पैदा भएको छ । करिव दुई सय विभिन्न अध्ययनले देखाएको नतिजापछि अनुसन्धानकर्ताहरूले यस्तो चेतावनी दिएका हुन् ।

शोधकर्ताहरूको भनाई छ कि उत्तर अमेरिका, युरोप, अष्ट्रेलिया, न्युजील्याण्डका पुरुषहरूमा बितेको चार दशकमा शुक्राणुको सङ्ख्या घटेर पहिलेको तुलनामा आधा हुन पुगेको छ ।

मनुष्यको प्रजनन प्रक्रियाबारे आएको यस प्रतिवेदनमाथि कतिपय विशेषज्ञले सन्देह जनाएपछि उक्त अनुसन्धान कार्यको अगुवाई गरेका डा. हगाई लेविनले शोधको नतिजाले आफूलाई अत्यन्त चिन्तित बनाएको र आगामी समयमा मानिस जन्मने क्रम घट्दै गई अन्ततः अस्तित्व नै खतरामा पर्ने सम्भावना प्रचुर रहेको बताएर सनसनी मच्चाइदिएका छन् ।

डा. लेविनले यदि मानिसले जिउने कला या जीवनशैली परिवर्तन नगरे भविष्यमा के होला भन्नेमा आफू निकै चिन्तामा परेको उल्लेख गर्दै अप्राकृतिक खानपान र जीवनशैलीका कारण पुरुषमा शुक्राणु क्षयीकरणको समस्या बढेको बताएका छन् ।

तथापि, डा. लेविनको अनुसन्धान उत्तरी अमेरिका, युरोप, अष्ट्रेलिया र न्युजील्याण्डका पुरुषमाथि केन्द्रित रहेको र दक्षिण अमेरिका, एशिया र अफ्रिकाका पुरुषमा शुक्राणु कम हुने समस्या नदेखिएको भन्दै अर्काथरि वैज्ञानिकहरूले सन्तोष प्रकट गरेका छन् । यसको जवाफस्वरुप डा. लेविनले चाहिँ अहिले समस्या नदेखिएको स्थानका पुरुषहरूमा पनि ढिलो–चाँडो समस्या पैदा हुने सम्भावना प्रचुर रहेको औंल्याएका छन् । (एजेन्सीहरू)

तस्बिर : गुगल