विश्व मुटु महासंघको आह्वानमा सन् २००० को सेप्टेम्बरदेखि मनाउन थालिएको विश्व मुटु दिवस यस वर्ष सेप्टेम्बर २९ का दिन विश्वभर अर्थात् विश्व मुटु महासंघका १ सय ५० भन्दा बढी सदस्य राष्ट्रहरूमा मनाइँदै छ ।

विश्व मुटु महासंघको सन् २००५ को तथ्याङ्कअनुसार विश्वभर हरेक वर्ष १ करोड ७५ लाख भन्दा बढी मानिसहरूले रक्तनली, पक्षाघात तथा मुटुजन्य रोगका कारण ज्यान गुमाइरहेका छन् । हाल उक्त संख्या बढेर २ करोड नाघिसकेको अनुमान छ । तसर्थ, मुटुरोगलाई संसारकै एक नम्बरको ज्यानमारा मानिन्छ ।

हाल विश्वमै मानव मृत्युको प्रमुख कारण हुँदै त्यसले सिर्जना गर्ने सामाजिक र आर्थिक बोझमा पनि मुटुजन्य रोग जस्ता नसर्ने रोगको हिस्सा एक नम्बरमै रहेको छ । त्यसखाले विकराल समस्याबाट जोगिने भनेकै मानिसहरूलाई रोग लाग्नबाट कसरी बचाउने भन्ने हो । यसमा जनचेतनाको अत्यन्तै ठूलो भूमिका रहन्छ ।

विश्व मुटु विदसका अवसरमा संसारभर नै वृहत् मुटु परीक्षण शिविरहरू, वैज्ञानिक गोष्ठी तथा कार्याशालाहरू एवम् जनचेतनाको अभिवृद्धि गराउने खालका प्रवचनलगायत प्रभातफेरि जस्ता कार्यक्रमहरू गरिन्छन् ।

यसै सिलसिलामा नेपाल हार्ट नेट (मुटुजन्य रोग रोकथाम र उपचार गर्ने-गराउने १९ संघ संस्थाहरूको छाता संगठन) लगायत बिरामी चिकित्सकसहित नर्भिक इन्टरनेशनल हस्पिटलको संयोजकत्वमा शनिबार काठमाडौंमा एक वृहत् प्रभातफेरि कार्यक्रमको आयोजना गरिएको छ । प्रभातफेरिमा नर्भिक हस्पिटलका मुटुरोग विशेषज्ञहरू, कर्मचारीहरू लगायत अन्य हस्पिटलका मुटुरोग विशेषज्ञहरू, संघ संस्थाका पदाधिकारीहरू गरी करिब ४०० जना सहभागी थिए ।