माओवादी केन्द्रका नेता गोपाल किराँतीले पार्टी अध्यक्ष प्रचण्डले एमालेमा सिंगो पार्टीनै विलय गराउन खोजेको भन्दै दक्षिणपन्थी आत्मसमर्पणवाद विरुद्ध जुट्न आफ्ना कार्यकर्तालाई आह्वान गरेका छन् ।
सामाजिक संजालमा आफ्नो प्रतिक्रिया जनाउँदै किराँतीले माओवादी केन्द्र र एमाले बीच एकता गर्ने र एमालेको घाम चिन्हमा चुनाव लड्नु पर्ने क. प्रचण्डको प्रस्ताव नेपालको आन्तरिक राष्ट्रियता (पहिचान) विरोधी भएको समेत उल्लेख गरेका छन् ।
प्रचण्डको उक्त कार्य मार्क्सबाद, लेनिनबाद, माओबाद विरोधी भएको समेत किराँतीको ठम्याई छ उनले अघि थपेका छन्,‘यो कथित एकता वस्तुतः एमालेमा माओवादीको विलय हो ।’
उनले दक्षिणपन्थी आत्मासमर्पणबाद विरुद्ध एक हुन क्रान्तिकारीहरुलाई आह्वान समेत गरेका छन् ।
सोमबार बसेको माओवादी सचिवालय बैठकले एमालेसँग पार्टी एकीकरणको लक्ष्यसहित चुनावी तालमेल गर्ने निर्णय गरेको थियो ।
उक्त निर्णय आफूहरुलाई मान्य नहुने भन्दै सचिवालय सदस्यहरु मातृका यादव, प्रभु शाह, मणि थापा र गोपाल किरातीले नोट अफ डिसेन्ट लेखेका थिए ।
यी चारै नेताले एमालेसँग समबन्ध बढाउन नहुने पार्टी अध्यक्षलाई सुझाएका थिए ।
पार्टीले दीर्घकालीन योजना बनाएर अघि बढ्नुपर्ने बताउँदै उनीहरुले माओवादीले बोकेको सिद्धान्त र जनयुद्धको मनोभावनालाई मार्न नहुने बताएका थिए ।
प्रतिक्रिया