विद्यार्थीलाई छात्रवृत्तिका बारेमा जानकारी नै नहुँदा छात्रवृत्ति दिने निकाय अन्योलमा पर्ने गरेको छ। विद्यार्थी वित्तीय सहयोग कोष विकास समितिले शैक्षिक वर्ष २०६४-०६५ बाट शुरु भएको दोस्रो उच्च शिक्षा परियोजनाअन्तर्गत विद्यार्थीलाई छात्रवृत्ति दिँदै आएको थियो। आर्थिक रूपले विपन्न, पिछडिएका क्षेत्रका, जेहेनदार वा दलित विद्यार्थीलाई लक्षित गरी कक्षा ११ र १२ मा विज्ञान संकाय र स्नातक तहमा अध्ययन गर्ने विद्यार्थीलाई छात्रवृत्ति उपलब्ध गराउँदै आएको थियो।

‘विद्यार्थीलाई सही समयमा जानकारी दिन नसकेको कारण छात्रवृत्ति वितरणमा समस्या हुन थालेको हो ।’–समितिका कार्यकारी निर्देशक दिवाकर ढुंगेलले बताए । ‘छात्रवृत्तिका लागि कोटाभन्दा कम विद्यार्थीको मात्रै आवेदन पर्ने गरेको छ, हामीले बुझाउन नसकेको कारण समस्या परेको हो ।’ –उनले भने ।
सामुदायिक विद्यालयमा पढ्ने विद्यार्थीका लागि व्यवस्था गरिएको सो छात्रवृत्ति हालसम्म करिब ४ हजार विद्यार्थीले मात्र प्राप्त गरेका छन्। पछिल्लो तथ्यांकअनुसार कार्यक्रम शुरु भएको तीन वर्षमा शैक्षिक वर्ष २०७१-७२ मा कक्षा ११ र १२ मा ३ सय २८ जनालाई मात्रै छात्रवृत्ति प्रदान गरिएको थियो। यस्तै शैक्षिक वर्ष २०७२-७३ मा ४ सय ३६ जनालाई उक्त छात्रवृत्ति प्रदान गरिएको थियो ।

यस्तै स्नातकतर्फ दोस्रो वर्ष १ हजार ९ सय ३३ जनालाई मात्रै उक्त छात्रवृत्ति प्रदान गरिएको थियो । पहिलो वर्ष भने २ हजार ५ सय ९१ जना उक्त छात्रवृत्तिका लागि योग्य भएका थिए । कस्ता विद्यार्थीले छात्रवृति पाउने भन्ने विषयमा उचित जानकारी गराउन नसक्दा समस्या पर्दै गएको छ । छात्रवृत्तिका लागि थुप्रै विद्यार्थीले पीएमटी फारम भरेका भए पनि थोरै विद्यार्थीले मात्रै छात्रवृत्ति पाउने गरेका छन् ।

कक्षा ११ अध्ययन गरिरहेका विद्यार्थीले कक्षा १२ लाई निरन्तरता दिएपछि मात्रै छात्रवृत्ति पाउने व्यवस्था गरिएको छ ।

समितिद्वारा कक्षा ११ र १२ मा प्रतिवर्ष ५ सय र स्नातक तहमा २ हजार ५ सय विद्यार्थीलाई प्रदान गरिने उल्लेख गरिएको थियो। गरिब लक्षित पन्चवर्षीय परियोजनाअन्तर्गत सो छात्रवृत्ति १४ हजारभन्दा धेरै विद्यार्थी लाभान्वित भएको र हाल उच्च शिक्षा सुधार परियोजनाअन्तर्गत सञ्चालित यो कार्यक्रमले ९ हजार ५ सय विद्यार्थीलाई छात्रवृत्ति दिने योजना रहेको छ।

समितिमार्फत् पहिलो वर्षमा ७ करोड र दोस्रो वर्षका लागि १६ करोड रुपियाँ वितरण गरिएको थियो । उक्त समूहका कक्षा ११ र १२ मा विज्ञान विषय तथा स्नातक तहमा जुनसुकै विषय लिएर अध्ययन गरिरहेका विद्यार्थीलाई छात्रवृत्तिको व्यवस्था गरिएको छ । (नेपाल समाचारपत्र)