‘आईजी’को दाबी गर्दागर्दै डीआईजी ओहोदाबाटै बिदा हुन बाध्य भएका नेपाल प्रहरीका निवर्तमान डीआईजी नवराज सिलवाल यतिबेला एमालेको टिकटबाट प्रतिनिधिसभा सदस्यको चुनाव लडिरहेका छन् । ललितपुरको क्षेत्र नम्बर १ बाट प्रतिनिधिसभा सदस्यमा प्रत्यक्षतर्फको उम्मेदवार रहेका सिलवाल प्रहरी महानिरीक्षकको जिम्मेवारी आफँैले पाउनुपर्ने भनी सर्वोच्च अदालतमा दिएको मुद्दा हारेपछि सङ्गठनबाटै राजीनामा दिएर राजनीतिमा लागेको जगजाहेर छ ।
तर, प्रहरी नायव महानिरीक्षकबाट राजीनामा दिएर हिँडे पनि सिलवालको ‘राजीनामा प्रकरण’ले यतिबेला फेरि पुलिस हेडक्वार्टरमा खलबली मच्चाएको बुझिएको छ ।
प्रहरी सूत्रका अनुसार सिलवालको राजीनामा स्वीकृत गरेर गृह मन्त्रालयले प्रहरी प्रधान कार्यालयमा पठाएको जानकारी पत्र नै गायब भएको छ । मुद्दा हारेका नवराजलाई सान्त्वना दिन एमाले अध्यक्ष केपी ओलीले ‘गृहमन्त्री’ नै बनाइदिने सार्वजनिक अभिव्यक्ति दिए । ओली–अभिव्यक्तिबाट हौसिएका सिलवालले पनि दायाँबायाँ केही नहेरी तत्काल ओहोदाबाट राजीनामा दिएका थिए । उनको राजीनामा गृहले स्वीकृत पनि ग¥यो र नियमानुसार स्वीकृतिपत्र प्रहरी प्रधान कार्यालय पठायो । उक्त पत्र गृहबाट हेडक्वार्टर पुग्दानपुग्दै गायब पारिएको खुलासा यतिबेला आएर भएको छ ।
नवराजले छोडेपछि नियमतः उक्त स्थान खाली हुन आउने र रिक्त स्थानमा कुनै एक एसएसपीले बढुवा पाउनुपर्ने थियो । तर, गृहले पठाएको पत्र नै गायब पारिएपछि सो कोटा एकातिर हालका लागि त्यत्तिकै ‘बेपत्ता’ भएको छ भने अर्कोतिर सांसद बन्न ललितपुरमा भोट माग्दै गरेका नवराज सिलवाल अझै डीआईजी पदका कायम रहेको अर्थ लाग्न पुगेको छ ।
बताइएअनुसार प्रहरी प्रशासनमा भएको यो लापरबाही पहिलो होइन । यसअघि पनि यस्ता बेथिति पटक–पटक भएका छन् । जहाँसम्म गृहले प्रहरी प्रधान कार्यालय पठाएको सिलवालको राजीनामा जानकारी–पत्र हराएको सवाल छ, कसले कुन नियतले पत्र गायब गरेको हो रहस्यपूर्ण तथा खोजीको विषय बन्न पुगेको छ ।
प्रतिक्रिया