प्रतिनिधिसभा तथा प्रदेशसभाको निर्वाचन नजिकिँदै जाँदा विभिन्न जिल्लाबाट नेत्रविक्रम चन्द नेतृत्वको नेपाल कम्युनिस्ट पार्टी (नेकपा) का कार्यकर्ताहरू पक्राउ पर्ने क्रम बढेको छ ।

प्रहरीले दर्जनौँ विप्लवका नेतादेखि कार्यकर्ता ,विप्लव सम्बद्ध पत्रकारहरुलाई समेत नियन्त्रणमा लिएको छ ।

यसैक्रममा चुनाव विरोधी गतिविधिमा संलग्न रहेको भन्दै हालैमात्र नेकपा लुम्बिनी ब्युरो सदस्य तथा नवलपरासी जिल्ला इन्चार्ज पदम केसीलाई प्रहरीले नियन्त्रणमा लिएको छ ।

गैंडाकोट नगरपालिका–१३ का केसीलाई सुनवल नगरपालिका–११ स्थित भुमहीबाट पक्राउ गरिएको जिल्ला प्रहरी कार्यालय नवलपरासी (परासी) प्रहरीले जनाएको छ ।

यस्तै, प्रहरीले बर्दघाट नगरपालिका–४ का बर्दघाट नगर कमिटी सदस्य मोहन सापकोटालाई पनि प्रहरीले पक्राउ गरेको जनाएको छ । पक्राउ परेका दुवैलाई जिल्ला प्रहरी कार्यालयमा राखिएको प्रहरीले जानकारी दिएको छ ।

नेकपाका तीन कार्यकर्तालाई प्रहरीले पक्राउ गरेको छ । सल्यान कुमाखमालिका–४ जिमालीका जंगबहादुर चन्द, कुमाखमालिका–६ बडागाउका सहवीर नेपाली र बागचौर–३ खुमबहादुर वलीलाई प्रहरीले पक्राउ गरेकोे हो ।

चन्द र परियारलाई घरमै रहेको अवस्थामा पक्राउ गरेको र वलीलाई थारमारेमा रहेको होटलबाट पक्राउ गरिएको परिवारले जानकारी गराएको छ । चुनाव विरोधि गतिविधि गरेकाले उनिहरुलाई पक्राउ गरिएको प्रहरीले जानकारी दिएको छ ।

चन्द नेतृत्वको नेकपाका तीन जना सक्रिय कार्यकर्ताहरुलाई नियन्त्रणमा लिएको छ । चौरी देउराली गाउँपालिकाका डिल्लीप्रसाद दुलाल र भीमसेन गौतम तथा बनेपा–१४ का रामकुमार तामाङलाई प्रतिनिधिसभा र प्रदेशसभाका निर्वाचन बिथोल्न तयार पारिएका कागजपत्रसहित नियन्त्रणमा लिएको जिल्ला प्रहरी कार्यालय काभ्रेले जनाएको छ । काभ्रेमा पछिल्लो समय सुरक्षा थ्रेट बढेको भन्दै प्रहरीले चन्दका कार्यकर्तामाथि निगरानी बढाएको छ ।

आज मात्रै निर्वाचन विरोधी क्रियाकलापमा संलग्न रहेको आरोपमा नेत्रविक्रम चन्द ‘विप्लव’ नेतृत्वका नेकपाका चारजना कार्यकर्तालाई प्रहरीले पक्राउ गरेको छ ।

पक्राउ पर्नेमा इलाम नगरपालिका–५ भोर्लेनीकी मुना भनिने वसुन्धरा कार्की, वडा नं।–११ सोयाकका सञ्जिव फागो, वडा नं–१ साँखेजुङका विशाल राई र देउमाई नगरपालिका–८ जितपुरका मोहन बराल पक्राउ रहेका छन् । यस्तै, निर्वाचन विरोधी गतिविधिमा संलग्न रहेका आरोपमा इटहरी प्रहरीले नेत्रविक्रम चन्द ‘विप्लव’ नेतृत्वका नेकपाका एक जना कार्यकर्तालाई पक्राउ गरेको छ ।

पक्राउ पर्नेमा इटहरी उपमहानगरपालिका–९ का ज्योति प्रसाईं रहेको इलाका प्रहरी कार्यालय इटहरीले जनाएको छ ।

यस्तै, नेत्रविक्रम चन्द नेतृत्वको नेकपानिकट क्रान्तिकारी पत्रकार संगठनका पत्रकारलाई प्रहरीले नियन्त्रणमा लिएको छ । रूपन्देहीबाट प्रकाशित हुने ‘गर्जन पोष्ट’ साप्ताहिकका सम्पादक प्रकाश डुम्रेलाई रूपन्देहीबाट गिरफ्तार गरेको छ ।

यस्तै, कालिकोटबाट प्रकाशित हुने ‘जनप्रभात’ साप्ताहिकका समाचार प्रमुख जगदिशनाथ योगी, सोही पत्रिकाका प्रकाशक सम्पादक कालीबहादुर महतारालाई गिरफ्तार गरेको छ ।

त्यसैगरी, ‘मध्याह्न’ दैनिकका पत्रकार दीपेश शाही, काठमाडौंबाट प्रकाशित हुने ‘हाम्रो जलजला’ मासिकका सम्पादक खेम थपलिया, काठमाडौंबाटै प्रकाशित हुने नेवारी पत्रिका

‘निहिगु ज्वजोलोप्पा’का सम्पादक जितेन्द्र महर्जनलाई पनि पक्राउ गरिएको छ । ‘प्युठान भिजन’ मासिक पत्रिकाका सम्पादक जयेश्वर आचार्य र कार्यकारी सम्पादक पदमप्रसाद पोख्रेललाई पनि गिरफ्तार गरेर हिरासतमा राखिएको जनाइएको छ ।

प्रहरीले विप्लवलाई समेत खोजी गरिरहेको गृह मन्त्रालय स्रोत बताउछ । स्रोतका अनुसार सरकारले निगरानी बढाएपछि उनी अहिले भूमिगत छन् ।