प्रधानमन्त्री तथा नेपाली कांग्रेसका सभापति शेरबहादुर देउवाले सप्तरीको कठौनामा २५ शैय्याको अस्पता निर्माण गर्ने बचन दिएका छन् । विहिबार सप्तरीको निर्वाचन क्षेत्र नम्बर ३ स्थित शम्भुनाथ नगरपालिकाको कठौनाबजारमा आयोजित काङ्ग्रेसको चुनावी सभालाई सम्बोधन गर्दै सभापति देउवाले यस क्षेत्रका काङ्ग्रेसका प्रतिनिधिसभाका उम्मेदवार दिनेश यादवले स्थानीय जनतासमक्ष गरेका प्रतिबद्धता सबै पूरा गरिने बताए ।

मधेस र मधेसी जनता काङ्ग्रेसकै पक्षमा रहेको दाबी गर्दै देउवाले कांग्रेसको आधार शुरुदेखि नै मधेस र मधेसी जनता रहेको भन्दै मधेसको मन जित्ने प्रयास गरे । दासताबाट मुक्तिका साथै विकास र समृद्धिका लागि नेपाली कांग्रेसको विजय अपरिहार्य रहेको देउवाको भनाई थियो ।

मुलुकलाई कम्युनिष्टमुक्त बनाउने अभियानमा कांग्रेस अघि बढेको उल्लेख गर्दै प्रधानमन्त्री देउवाले कम्युनिष्ट जितेमा जनताले दास बन्नुपर्ने तर्क गरे ।

कम्युनिष्टले जनताको अधिकार खोस्नका लागि अधिनायकवादी चरित्र प्रदर्शन गरेकोले मतदाताले निकै सचेत भएर मत दिनुपर्ने पनि देउवाको भनाई थियो ।

कांग्रेसले मधेसलाई अधिकार दिन खोज्दा एमाले बाधक भएको आरोप पनि उनले लगाए । यसपटक बाम गठबन्धनको बहुमत आउँछ भनी गरिएको हल्लामा कुनै दम नभएको दाबी गर्दै देउवाले बहुमत त कांग्रेसकै आउने बताए ।

सभामा खेलकुद राज्यमन्त्री तेजुलाल चौधरी र प्रतिनिधिसभाका लागि क्षेत्र नम्बर ३ का प्रत्यासी दिनेश यादवले पनि सम्बोधन गरेका थिए ।