गएको स्थानीय निर्वाचनमा झापाको कनकाई नगरपालिकामा तराई–मधेश लोकतान्त्रिक पार्टीबाट उपप्रमुखमा स्वतन्त्र उम्मेदवार बनेका धर्मलाल राजवंशीले वर्तमान बाम गठबन्धनलाई चिनी हालेको खिचडीको संज्ञा दिएका छन् । झापाको घैलाडुब्बा बजारमा विहिबार आयोजित पार्टी प्रवेश कार्यक्रमर्ला सम्बोधन गर्दै राजवंशीले सत्ता स्वार्थका लागि बाम गठबन्धनका नाममा गरिएको गठबन्धनले तीन÷चार वटा झण्डा हल्लाएर हिँड्दा जनतामा विश्वास गुमेको बताए ।

बामगठबन्धनको कुनै अर्थ नरहेको बताउँदै राजवंशीले भने– ‘खिरमा नुन र खिचडीमा चिनी मिसाएजस्तै हो । खिचडीमा चिनी हाल्दा र खिरमा नुन हाल्दा त्यसको स्वाद कस्तो हुन्छ, आफैं विचार गर्नुस् ।’

चुनावी खेलमा हारजित जे भए पनि तीन÷चार वटा झण्डा हल्लाएर अल्मलिएको हिंडाइ भन्दा एक्लै हिँड्नु नै सन्तोषजनक हुने राजवंशीको सुझाव थियो ।

कार्यक्रममा नेपाल परिवार दलबाट २०७० को संविधानसभा निर्वाचनमा क्षेत्र नम्बर–५ बाट समानुपातिक उम्मेदवार रहेका सत्यनारायण साह, राष्ट्रिय जनता पार्टी नेपालकी जिल्ला सदस्य अर्लावती राजवंशी सहित १ सय १५ जना बढी नेकपा एमाले लगायत विभिन्न पार्टी परित्याग गरी नेपाली कांग्रेसमा प्रदेश गरेका थिए ।

नवप्रवेशीलाई झापा क्षेत्र नम्बर–२ बाट नेपाली कांग्रेसका तर्फबाट प्रतिनिधिसभा सदस्यका उम्मेदवार उद्धव थापा, क्षेत्र नम्बर–२ प्रदेश ‘क’का उम्मेद्वार लक्ष्मण खड्का लगायत समानुपातिक उम्मेद्वार तथा स्थानीय नेताहरुले स्वागत गरेका थिए ।

नारायणप्रसाद नेपालको सभापतित्वमा सम्पन्न कार्यक्रमको सञ्चालन गोविन्द चुडालले गरेका र स्वागत मन्तव्य गोविन्द प्रधानले दिएका थिए ।

– रेजिना गौतम