प्रदेश नम्बर ५ को राजधानी बुटवलमा बनाउनका लागि मन्त्रालयलगायत प्रशासनिक निकायका लागि सम्भावित भवनहरूको खोजी शुरु भएको छ । क्षेत्रिय प्रशासन कार्यालय पोखराका क्षेत्रिय सह–प्रशासक बाबुराम गौतमको नेतृत्वको टोलीले बुटवलमा मुख्यमन्त्रीको कार्यालयदेखि मन्त्रालय बस्न सक्ने सम्भावित भवन र क्षेत्रहरुको अध्ययन गरेको छ ।

‘बुटवलमा प्रदेशको राजधानी बनाउनका लागि आवश्यक पर्ने प्रशस्त कार्यालयहरू रहेका छन्’, बुटवलमा भवनको खोजीमा आएका क्षेत्रीय सह प्रशासक गौतमले भने– ‘मुख्यमन्त्रीको कार्यालयदेखि मन्त्रालयहरू बस्नका लागि आवश्यक कार्यालय पर्याप्त भेटिएका छन् ।’
सरकारी कार्यालय तथा निजी क्षेत्रका ठूला भवनहरुको समेत अवलोकन गरिएको उल्लेख गर्दै उनले भने, ‘प्रदेशको राजधानी बनाउनका लागि बुटवलमा ठूलो जोडबल देखियो, निजी क्षेत्र आफ्ना भवन दिन तयार छन्, बुटवल उद्योग वाणिज्य संघ, रुपन्देही व्यापार संघले समेत आफ्ना कार्यालयहरु सरकारले उपयोग गर्न सक्छ भनेर लिखित रुपमै दिएका छन् ।’

गौतम नेतृत्वको टोलीले बुटवलस्थित श्रम कार्यालय, सडक डिभिजन कार्यालय, इलाका प्रशासन कार्यालय, यातायात व्यवस्था कार्यालय, राजस्व अनुसन्धानको कार्यालय, सीप विकास तालिम केन्द्र, इलाका वन कार्यालय, नापतौल तथा गुणस्तर कार्यालयलगायतका कार्यालयहरुको भवन निरिक्षण गरेको हो ।

‘श्रम कार्यालयको विशाल भवन बनिरहेको छ, यहाँ ३–४ वटा मन्त्रालय राख्न सकिन्छ, राजस्व अनुसन्धानको भवनमा २ वटा मन्त्रालय राख्न सकिन्छ, इलाका प्रशासन कार्यालय, यातायात व्यवस्था कार्यालयका भवनहरु बनिरहेका छन्, यी र अरु पहिले देखिकै भवनहरु रहेका कार्यालयहरु पनि पर्याप्त छन्,’ गौतमले निरीक्षणपछि भने– ‘यहाँ भवन अपुग हुने देखिँदैन, चलिरहेका कार्यालयहरुलाई अन्यत्र सारेर मन्त्रालयहरु राख्न सकिन्छ र अधिकांश भवनहरु नयाँ रहेकाले व्यवस्थापन गर्न पनि सहज हुन्छ ।’ उनले बुटवलमा राजधानी बनाउनका लागि पर्याप्त संरचनाहरु देखिएको र सहजै कार्यालय सञ्चालन गर्न सकिने दाबी गरे । उनले भने– ‘सरकारले क्षेत्रीय प्रशासन कार्यालयमार्फत प्रतिवेदन तयार गर्न भनेको छ, हामी बुटवल उपयुक्त छ र कार्यालयहरु पर्याप्त छन् भनेर प्रतिवेदन पेश गर्नेछौँ ।’

निजी क्षेत्रसँग सरकारले माग गरेमा भवन उपलब्ध गराउन सक्ने÷नसक्ने विषयमा छलफल गरेको छ । छलफलका क्रममा निजी क्षेत्रले प्रदेशको राजधानी बुटवलमा बनाउनका लागि पहल गरिरहेको र राजधानी बुटवल बनाउनका लागि भवन उपलब्ध गराउन तयार रहेको बताएको छ ।