बिहार (भारत)को बहुचर्चित चारा घोटाला मामलामा राँचीको सिबिआई कोर्टले त्यहाँको राष्ट्रिय जनता दलका अध्यक्ष लालुप्रसाद यादवलाई दोषी प्रमाणित गरेको छ । दोषी घोषणा गरिनेवित्तिकै अदालत परिसरबाटै हिरासतमा लिएर लालुलाई राँचीको बिरसा मुण्डा जेल पठाइएको छ ।

कैदी नम्बर ३३५१ का रूपमा राँची जेलको हावा खान पुगेका लालुको मुद्दामा कस्तो सजाय तोक्ने भन्ने आगामी जनवरी ३ तारिकमा निर्धारित हुने भारतीय मिडियाहरूले जनाएका छन् ।

शनिबार राती जेल लैजाँदै गर्दा लालुलाई के खान मन छ भनी सोध्दा उनले कुनै प्रतिक्रिया नदिएको सन्दर्भलाई मिडियाले विशेष फोकस गरेका छन् । लालु निरुत्तर रहेपनि उनका कान्छा छोराले ‘पापालाई रोटी दिनु’ भनी सुझाएका थिए । फलतः लालुप्रसादलाई पाँचवटा रोटी, एक कचौरा दाल र तरकारी दिइएको थियो । उक्त भोजन उनले स्वादसँग खाएका थिए ।

आफूमाथि लगभग दुई दशक पुरानो चारा घोटाला मुद्दामा यस्तो फैसला गराएर जेल पठाउनुमा लालुले भाजपा सरकारलाई जिम्मेवार ठह¥याएका छन् । यो असन्तुष्टि उनले अदालतको फैसला आउनेवित्तिकै ट्वीटमार्फत् व्यक्त गरेका थिए । चारा घोटालामा डा. जगन्नाथ मिश्रलाई सफाई दिएर आफूलाई दोषी गरिनु अचम्मको फैसला भन्दै लालुले सिबिआई कोर्टप्रति ब्यंग्यसमेत गरेका थिए ।

ज्ञातव्य छ, चारा घोटालाको खुलासा सन् १९९४ मा भएको थियो । उक्त मामलामा शुरुमा दुई–चार करोड भारुको भ्रष्टाचार भएको भनिए पनि भ्रष्टाचारको रकम बढ्दै गएर पछि नौ सय करोड भारु रहेको बताइएको थियो । यस मामलामा कैयन सरकारी कर्मचारी र ठेकेदारहरू मुछिएका थिए भने पशुको दानासम्बन्धी यस बहुचर्चित भ्रष्टाचारको मूल पात्र लालु यादव रहेका थिए ।