नेकपा एमालेका अध्यक्ष केपी शर्मा ओलीले आफू थाइल्याण्डबाट फर्केपछि नेकपा माओवादी केन्द्रसँग अबको १५ दिन भित्रै पार्टी एकता हुने बताएका छन् ।

उपचारका लागि बुधबार थाइल्याण्ड जानुअघि त्रिभुवन विमानस्थलमा आयोजित पत्रकार सम्मेलनमा उनले माओवादी केन्द्रसँग १५ दिनभित्र एकता हुने दावी गरे ।

वामपन्थी पार्टीहरुबीच एकता हुन नदिन अनेक षड्यन्त्र भइरहेको भन्दै ओलीले त्यसलाई असफल पारेर एकता गरि छाड्ने बताए ।

‘बैंककबाट फर्केलगत्तै पार्टी एकताका लागि काम गर्छौ । हाम्रो एकताबाट आत्तिएका तर्सिएकाहरु अरुको आन्तरिक मामिलामा हस्तक्षेप गर्ने गरेका छन’ उनले भने ‘केही प्रतिक्रियावादी प्रयास सफल हुँदैनन् । पार्टी एकता सफल हुन्छ ।’

पार्टी एकता हुँदा माओवादी केन्द्रका अध्यक्ष पुष्पकमल दाहाल प्रचण्ड अध्यक्ष बन्ने हो भनी पत्रकारले सोधेको प्रश्नमा ओलीले भने ‘१५ दिनमा एकता गर्दैछौं । अहिले नै किन हतार गर्ने ?’ नियमित स्वास्थ्य परीक्षणका क्रममा बुधबार थाइल्याण्डको बैंकक गएका ओली एक हप्तापछि फर्किने कार्यक्रम रहेको छ ।

अहिलेको सरकारले जनताको अभिमतको अवमूल्यन गरिरहेको भन्दै ओलीले सत्ता हस्तान्तरणमा ढिलाइ गर्न नहुने बताए ।

‘जुन प्रयोजनका लागि चुनाव ग-यौं अहिले त्यही हुन सकेन । अनेक प्रपञ्च रचेर जनताको अभिमतको अवमूल्यन भइरहेको छ’ उनले भने । राष्ट्रियसभा निर्वाचनका लागि दल दर्ताको समय १५ दिन दिएर अलमल्याउने प्रपञ्च भएको ओलीले बताए ।

अहिले निर्वाचन आयोग पनि अहिले ब्ल्याकमेलिङको शिकार भएको ओलीको आरोप छ । उनको साथमा पत्नी राधिका शाक्य र सहयोगी राजेश बज्राचार्य पनि थाइल्याण्ड गएका छन् ।

ओलीलाई विदाई गर्न एमाले नेताहरु वामदेव गौतम, ईश्वर पोरखेरल र सुवास नेम्बाङ लगायतका नेताहरु एयरपोर्टमा पुगेका थिए । अध्यक्ष ओलीले बैंककस्थित वुङरुगाड अस्पतालमा उपचार गराउनेछन् ।

मिर्गौला प्रत्यारोपण गरेपछि नियमित स्वास्थ्य परीक्षणका लागि उनी बैंकक गएका हुन् । स्वास्थ्य परीक्षण गराई उनी माघ २ गते स्वदेश फर्कने कार्यक्रम रहेको छ ।