कृषि पेसालाई आत्मसात् गरेर मिहिनेत गरियो भने राजनीतिमा लागेकाले पनि परिवारको दैनिक जोहो टार्न भ्रष्टाचार गर्नुपर्दैन भन्ने उदाहरण अर्घाखाँचीको पाणिनी गाउँपालिकाका अध्यक्ष अच्युत गौतमले दर्शाएका छन् । अच्युतदम्पती गाउँपालिककै एक उदाहरणीय जोडी बन्न पुगेका छन् । आफू राजनीतिको माध्यमबाट समाजसेवामा संलग्न रहँदै गर्दा आत्मनिर्भरताको बाटो नसमाते सामाजिक कार्यमा लाग्न सकिन्न भन्ने स्पष्ट सोचका साथ अच्युत अघि बढे । उनको यस अभियानलाई शिक्षिकासमेत रहेकी श्रीमती निर्मला खनालले समय निकालेर कृषि व्यवसायमा हात बढाउन साथ दिइन् । फलतः अब स्वच्छ छविका साथ समाजसेवा वा राजनीति गर्न सकिन्छ भन्ने अठोटमा पुगेको छ गौतमदम्पती ।

करिब ५ वर्षअघिदेखि कृषिमा हौसिएका अच्युत पाणिनी गाउँपालिकाको अध्यक्ष भएपछि उनको व्यवसाय सम्हाल्न श्रीमती निर्मलाले दह्रिलो हात र साथ दिएकी छिन् । तथापि, फुर्सद निकालेर अच्युत स्वयम् पनि कृषि–कर्ममा हात बाँड्न पछि परेका छैनन् । आफू शुरुमा कृषिमा लागेकैले समाजसेवामा भिड्ने अवसर मिलेको बताउने उनी राजनीतिमा जतिसुकै सफलता मिले पनि कृषिकर्म नछोड्ने प्रतिबद्धता जनाउँछन् । उनको यो अठोट तमाम राजनीतिकर्मीका लागि गतिलो शिक्षा हुन सक्छ ।

०३१ सालमा जन्मिएका गौतमले ०४२ मा गाउँकै हरिहर संस्कृत तथा साधारण प्राविधिक विद्यालयमा अध्ययन गर्दैको अवस्थामा नेविसङ्घको सदस्यता लिएका रहेछन् । ०४६ सालमा उनी सङ्घको जिल्ला सचिव बनेका थिए । त्रिभुवन बहुमुखी क्याम्पस तानसेनमा क्याम्पस इकाइ सदस्य बन्ने अवसर उनलाई ०५० सालमा जुट्यो भने ०५४ मा तरुण दल पोखराथोकको अध्यक्ष र ०५८ मा नेपाली काङ्ग्रेस पोखराथोकको पार्टी सभापतिको जिम्मेवारी पाए । काङ्ग्रेसको १३औँ महाधिवेशनबाट जिल्लाको क्षेत्रीय सभापतिमा विजयी भई हाल सोही जिम्मेवारीमा रहेका उनी माओवादीपीडित परिवारका सदस्यसमेत हुन् ।

माओवादीसिर्जित द्वन्द्वकालमा आफ्नो घर–पसल लुटिएको र शिक्षण पेसामा रहेका पिता विस्थापित हुनुपरेको स्मरण गर्दै अच्युत यतिबेला पाणिनी गाउँपालिकालाई आफ्नो पाँचवर्षे कार्यकालमा भ्रष्टाचारमुक्त गाउँपालिका बनाउने अठोटका साथ क्रियाशील छन् । गौतमको व्यक्तित्व नजिकबाट नियाल्दा आलोकाँचो युवक हुन् कि भन्ने लागे पनि सीप, दक्षता, व्यवहारकुशलता र जिम्मेदारीप्रतिको लगावका आधारमा भन्नुपर्दा उनी जिल्लाकै अब्बल व्यक्तिका रूपमा चिनिन सक्छन् ।

नेपाली काङग्रेसको सङ्गठन कमजोर हुनुमा पार्टीका साथीहरूकै कमजोरी रहेको बताउने अच्युत गौतम राजनीति गर्नेले सर्वप्रथम आफ्नो आम्दानीको स्रोत पहिले नै जोगाड गरेर मात्र राजनीतिमा प्रवेश गर्नुपर्ने मान्यता राख्छन् । करिब ३५ रोपनी जमिनमा तरकारी खेती र कुखुरापालन व्यवसाय गर्दै आएका गौतमदम्पतीको व्यवसायमा दैनिक १६ जनासम्म स्थानीय बासिन्दाले रोजगारी पाएका र मासिक डेढ लाखसम्म आम्दानी हुने गरेको बुझिन्छ । गाउँमै यति आम्दानी भएपछि उनलाई राजनीति वा समाजसेवामा ढुक्कले लाग्न मार्गप्रशस्त हुने नै भयो ।

बेग्लै विशेषता बोकेका यी युवा गाउँपालिकाबाट विनियोजित बजेट कार्यान्वयनबारे आमनागरिकले जान्न पाउनुपर्छ भन्ने मान्यताका कडा पक्षपाती छन् । तसर्थ, सूचनाको हकका लागि क्रियाशील अर्घाखाँचीको चर्चित संस्था सूचना तथा सुशासन अभियान (सीआईजी)मार्फत आफनो गाउँपालिकाका प्रत्येक वडामा अच्युतले जनचेतना अभियान सञ्चालन गरिसकेका छन् । जसको माध्यमबाट गाउँपालिकाका एक हजार चार सय छब्बीस नागरिकले जान्न पाउने अधिकारको बारेमा प्रशिक्षण प्राप्त गरेका छन् ।

– मुक्तिनाथ भुसाल