चीनकी यिमिङ दाङ नेपाल आईटीएफ जुनियर यु–१८ टेनिस प्रतियोगिताको सर्किट–१ अन्तर्गत महिला सिंगल्समा माघ २५ गते विहीबार सेमिफाइनलमा प्रवेश गरेकी छिन् ।

सातदोबाटोस्थित टेनिस कोर्टमा यिमिङले भारतकी प्रिंकल सिंहलाई ६–१, २–६ र ६–३ को सेटमा पराजित गरिन् । सोही स्पर्धामा जापानकी कानोन यासुमोटोले भारतकी श्रीनिधि श्रीधरलाई ७–६(५) र ६–०, भारतकी दिब्या भानीले हङकङकी चुइ केइ लिउङलाई ७–५ र ६–३ तथा अमेरिकाकी रुतुजा छप्हल्करले जापानकी मनामी उकितालाई ६–१ र ६–१ को सेटमा हराउदै सेमिफाइनलमा स्थान सुरक्षित गरे ।

पुरुष सिंगल्समा जापानका ताइयो हिरानोले नाइथाउलिन केल्भिन गोल्मेईंलाई ५–७, ६–४ र ६–४, भारतका अनुराग अग्रवालले प्रशन्न प्रवीण बगाडेलाई ७–५ र ६–२, ताइपेईका चिया फन साउले वंश भग्तानीलाई ६–२ र ६–२ तथा जापानका ताइसेई कागेयामाले जैस्विन सिडानालाई ४–६, ७–५ र ७–५ को सेटमा पाखा लगाउदै सेमिफाइनलमा स्थान पक्का गरे । सेमिफाइनलमा पराजित चारै भारतका हुन् ।

अखिल नेपाल लनटेनिस संघको आयोजनामा भइरहेको प्रतियोगिताको पुरुष डबल्समा जापानका हिरानो र ताइपेईका साउको जोडीले भारतका वंश र जैस्विनको जोडीलाई ६–२ र ६–२ तथा चीनका वेनमाउ लि र याङझुवान लिको जोडीले जापानका दाइसुके इनागावा र कोगेयामाको जोडीलाई ६–३ र ६–४ को सोझो सेटमा पन्छ्याउदै फाइनलमा पुगे ।

महिला डबल्समा भारतका स्मृति भासिन र रुदया शाहको जोडीले भारतका अस्प्रित कौर वाज्वा र पुन्यातोया मोहपात्रको जोडीलाई ७–५ र ७–५ तथा हङकङकी लिउङ र भारतकी सान्या सिंहको जोडीले जापानका आयुमी हमा र यासुमोटोको जोडीलाई ६–१,३–६(१०–७) को सेटमा निराश पार्दै उपाधि भिडन्त पक्का गरे ।