आईसीसी डिभिजन–२ मा उत्कृष्ट प्रदर्शन गरेर विश्वकप छनोट चरणमा प्रबेश गरेको नेपाल आफ्नो अन्तिम खेलमा यूएईसँग पराजित भएको थियो । लिग चरणमा यूएईलाई पराजित गर्न सफल नेपाल फाइनल खेलमा यूएईसँग झिनो रन अन्तरले पराजित भएको थियो । यसरी नेपालको सानदार प्रदर्शनका बाबजुद पनि उपविजेतामै चित्त बुझाउनुपरेको थियो ।

निकै सनसनीपूर्ण रहेको फाइनल खेलमा यूएईले पहिलो ब्याटिङ गर्दै नेपालको सामु २ सय ७८ रनको चुनौती राखेको थियो । यूएईले उक्त योगफल ४ विकेटको क्षतिमा ५० ओभरमा बनाएको थियो । निकै चुनौतीपूर्ण योगफल भए पनि ब्याटिङ पिच भएका कारण नेपालले उक्त लक्ष्य भेट्टाउने अनुमान गरिएको थियो । २ सय ७८ रनको लक्ष्य लिएर मैदानमा उत्रिएको नेपालको सुरुवात पनि राम्रो रह्यो । ओपनरद्वय ज्ञानेन्द्र मल्ल र दिलीप नाथले पहिलो विकेटको लागि ३४ रनको साझेदारी गरेका थिए । त्यसपछि मैदानमा उत्रिएका दीपेन्द्रसिंह ऐरी र ज्ञानेन्द्र मल्लले पनि राम्रै योगदान दिएका थिए ।

फाइनल खेलमा कप्तान पारस खड्काले उत्कृष्ट प्रदर्शन गर्दै कप्तानी पारी खेलेका थिए । पारसले १ सय ३ बलमा १ सय १२ बनाएका थिए । पारसले आफ्नो सतकीय पारीमा ८ छक्का र ३ चौका प्रहार गरेका थिए । खेलको अन्तिम ओभरमा ३ छक्का प्रहार गरेका पारसले नेपाललाई जिताउन अथक प्रयास गरे पनि असफल भएका थिए । परिणाम नेपाल २ सय ७० रनमै सीमित हुँदा यूएई ७ रनले विजयी हुँदै च्याम्पियन बनेको थियो ।

आईसीसी डिभिजन–२ मा उत्कृष्ट प्रदर्शन गर्दै उपविजेता बनेपछि नेपाल सन् २०१९ मा आयोजना हुने एकदिवसीय विश्वकप क्रिकेट छनोट प्रतियोगितामा छनोट हुन सफल भएको छ । नेपाल उक्त प्रतियोगिताको समूह ‘बी’मा परेको छ । नेपालसँगै समूह ‘बी’मा आयोजक राष्ट्र जिम्बाबे, अफगानिस्तान, स्कटल्यान्ड र हङकङ रहेका छन् । समूह ‘बी’मा परेका टिमहरूमा हङकङ र नेपालबाहेक अन्य राष्ट्रले एकदिवसीय विश्वकप क्रिकेट प्रतियोगितामा यसअघि सहभागिता जनाइसकेका छन् । त्यस्तै, नेपाल र हङकङलाई पनि ट्वान्टी–२० विश्वकप क्रिकेट खेलेको अनुभव छ ।

त्यस्तै समूह ‘ए’मा विश्वच्याम्पियन वेष्टइन्डिज, आयरल्यान्ड, नेदरल्यान्ड, पपुवान्युगिनी र यूएई परेका छन् । १० वटा टिमबीच हुने विश्वकप छनोट चरणमा शीर्ष स्थान हासिल गर्ने दुई टिम आगामी वर्ष सन् २०१९ मा इंग्ल्यान्डमा हुने एकदिवसीय विश्वकपमा छनोट हुनेछन् । त्यस्तै शीर्ष तीनमा पर्ने टोलीले एकदिवसीय मान्यता पाउने छ भने पुछारमा रहने दुई टिम रेलिगेसनमा पर्नेछन् । ती टोली डिभिजन–१ बाट घटुवा भएर ‘बी’मा झर्नेछन् ।

नेपाल अहिलेसम्म एकदिवसीय विश्वकप क्रिकेट प्रतियोगितामा छनोट हुन सकेको छैन । त्यसैले आगामी १ मार्चदेखि २५ मार्चसम्म जिम्बाबेमा आयोजना हुने विश्वकप छनोट प्रतियोगिता नेपालका लागि अग्निपरीक्षा हुनेछ । समूह ‘बी’मा आयोजक राष्ट्र जिम्बाबे, अफगानिस्तान, स्कटल्यान्ड र हङकङ रहेका हुनाले विश्वकपको यात्रा नेपालका लागि त्यति सहज देखिँदैन । नेपालले शीर्ष स्थान हासिल गरेर विश्वकपको यात्रा तय गर्नुपर्ने बाध्यता छ । यस्तो चुनौतीको पहाडमा विश्वकप छनोट चरणमा नेपालले कस्तो प्रदर्शन गर्ला त्यो प्रतीक्षाको विषय बनेको छ । यदि नेपाल विश्वकपमा छनोट भए त्यो ऐतिहासिक सफलता हुनेछ । त्यसबाहेक यो प्रतियोगितामा नेपालले शीर्ष तीन स्थान हासिल गर्न सफल भए एकदिवसीय क्रिकेटको मान्यता पाउनेछ । यसमा नेपाल कति सफल हुन्छ त्यो नेपालको प्रदर्शनमा भर पर्नेछ ।