मनाङको नाशोङ गाउँपालिकाको शान्ति सुरक्षासम्बन्धी जानकारी आदनप्रदान गराउनका लागि जिल्ला प्रहरी कार्यालय मनाङले नागरिक सुनवाई कार्यक्रमको आयोजना गरेको छ । प्रहरीले जिल्लाको नाशोङ गाउँपालिकामा सो कार्यक्रमको आयोजना गरेको हो ।

मनाङका निमित्त प्रमुख जिल्ला अधिकारी जयराम भण्डारीको प्रमुख आतित्थ्यतामा भएको नागरिक सुनुवाई कार्यक्रममा गाउँपालिकाभित्र भएका शान्ति सुरक्षाको अवस्था, सामाजिक विसंगती र अन्य विविध विषयमा छलफल भएको थियो ।

नागरिक सुनुवाईमा बिशेष अतिथी समेत रहेका नाशोङ गाउँपालिका अध्यक्ष चन्द्र बहादुर घलेले सबैको साथ र सहयोगले गाउँपालिकालाई शान्त र सुन्दर बनाउन सकिनेमा जोड दिए । समाजमा आतंक मच्चाउने र शान्ति सुरक्षामा आँच आउने कार्य कसैले पनि नगर्न अध्यक्ष घलेको सबैलाई आग्रह छ ।

सो अवसरमा स्थानियहरुले गाउँपालिकाभित्रका सुरक्षा सम्बन्धी बिषयमा धारणा राखेका थिए । धारापानी प्राविकी प्रधानाध्यापक रत्ना गुरुङले चेलीबेटी बेचबिखन तथा ओसारपोसार बिरुद्ध सबै महिलाहरु सचेत हुनुपर्ने र हराएका चेलीबेटीहरुको खोजतलासमा प्रहरीबाट तदारुक्ताका साथ लागि पर्नुपर्नेमा जोड दिइन् । यस्र्तै, प्रकाश मावि थोचेका प्रधानाध्यापक पदमराज पन्थीले ‘प्रहरी मेरो साथी’ भन्ने कार्यक्रम स्कुलहरुमा पुनः संचालन गर्नुपर्नेमा जोड दिए ।

यस्तै, स्थानियहरुको जिज्ञासा मेटाउँदै जिल्ला प्रहरी कार्यालय मनाङका प्रहरी नायव उपरिक्षक श्यामकृष्ण अधिकारीले समाजमा भएका विसंगति र बेथितिलाई हटाउन प्रहरीलाई सहयोग गर्नुपर्नेमा जोड दिए ।