छविलाल बगाले
दैनिक १८ घण्टासम्म सञ्चालन हुँदै आएको त्रिभुवन अन्तराष्ट्रिय विमानस्थल आजदेखि २१ घण्टा सञ्चालन हुने भएको छ । पूर्वाधार बाधक भएपनि सरकार चौविसै घण्टा विमानस्थल सञ्चालन गर्न तयार भएको हो ।

संस्कृति, पर्यटन तथा नागरिक उड्डयन मन्त्रालयले आजदेखि त्रिभुवन अन्तराष्ट्रिय विमानस्थल दैनिक २१ घण्टा संचालनमा ल्याएको हो । भइरहेका उडानलाई व्यवस्थित बनाउन र एयर ट्राफिकको समस्यालाई हटाउनको लागि मन्त्रालयले १८ घण्टामा सीमित विमानस्थलको सेवालाई बढाएर २१ घण्टा संचालन गर्न लागेको हो ।

विगतमा १२ घण्टामा सीमित रहेको विमानस्थलको सेवालाई १८ घण्टा पु¥याएपनि आगामी दिनमा चौविसै घण्टा सेवा दिने उद्धेश्यले २१ घण्टा विमानस्थल खुला राख्ने मन्त्रालयका सह–सचिव बुद्धि सागर लामिछानेले घटना र बिचारलाई जानकारी दिए । ‘हामीले आजदेखि चौविसै घण्टा विमानस्थल संचालन गर्न थालेका छौं ।’ उनले भने, ‘लक्ष्य लिएर अघि बढेपछि सफल भइन्छ ।’

सरकारी तथ्यांक अनुसार हाल नेपालको कूल ग्राहस्थ उत्पादनमा पर्यटन क्षेत्रको योगदान २ दशमलव ८ प्रतिशत रहेको छ । मुलुकको अर्थतन्त्रमा पर्यटन क्षेत्रको योगदान २५ प्रतिशत पु¥याउने महत्वकांक्षी योजनालाई पूरा गर्नका लागि मन्त्रालयले विमानस्थलको सेवालाई बढाएको हो ।

अहिले विहान ६ बजेदेखि राति साढे १२ बजेसम्म आन्तरिक तथा बाह्य वायु सेवा कम्पनीहरुले उडान भरिरहेका छन् । २१ घण्टासम्म विमानस्थल सञ्चालन हुँदा सेवाग्राहीले भरपर्दो सेवा पाउने, एयर तथा ग्राउण्ड ट्राफिकमा कमी आउने र वायु सेवा कम्पनीहरुको संचालन खर्च घट्ने वायुसेवा सञ्चालक संघ नेपाल (आयोन) ले जनाएको छ । हिजो आइतबारसम्म साढे १२ बजेसम्म सञ्चालन हुँदै आएको विमानस्थल आजबाट बिहान ६ बजेदेखि अर्को दिन बिहान तीन बजेसम्म सञ्चालन हुने विमानस्थलका महाप्रबन्धक राजकुमार क्षेत्रीले जानकारी दिए । उनका अनुसार त्रिभुवन विमानस्थललाई २१ घण्टा सञ्चालन गर्न चाहिने एटीसीलगायत आवश्यक जनशक्ति व्यवस्थापन भइसकेको छ । बोर्ड बैठकले अतिरिक्त समय खटिने कर्मचारीहरुलाई प्रोत्साहन भत्ता दिने निर्णय पनि गरिसकेको बुझिएको छ ।

विमानस्थल सेवाप्रदायक संस्था हो भने वायुसेवाले सेवा किनेर यात्रुहरुलाई बेच्ने गर्दछन् । तर विमानस्थल नसुध्रिएका कारण विमान कम्पनी र यात्रुहरुले सास्ती खेप्दै आइरहेका छन् । सरकारले भने सन २०१९ भित्र गौतम वुद्ध अन्तराष्ट्रिय विमानस्थल संचालनमा ल्याइसक्ने र सन् २०२० मा कम्तिमा २० लाख पर्यटक भित्र्याउने लक्ष्य लिएको छ ।