अमेरिकी रक्षा मन्त्रालय पेन्टागनले आप्रवासी बालबालिकाका लागि करिब २० हजार विछ्यौनासहितको वासस्थान निर्माण गर्ने भएको छ ।

पेन्टागनका प्रवक्ता ज्यामिन डेभिसले बिहीबार एएफपी समाचार समितिलाई दिएको जानकारीअनुसार अमेरिकी स्वास्थ्य तथा मानवीय सेवा विभागको अनुरोधमा आप्रवासी बालबालिकाका लागि २० हजार अस्थायी विछ्यौनासहितको वासस्थानको व्यवस्था गर्न लागिएको हो ।

अमेरिकी राष्ट्रपति डोनाल्ड ट्रम्पले आप्रवासी नीतिप्रति केही लचिलो भएर आप्रवासी नागरिकका बालबालिकालाई पनि सँगै बस्न दिइने नीतिमा सहमति जनाएलगत्तै यो समाचार आएको छ ।

अमेरिकामा रहेका कुनै कागजात नभएका अथवा दर्ता नगरिएका आप्रवासीका बालबालिकालाई आमाबाबुबाट छुट्याएर अलग्गै गर्ने नीति यसअघि राष्ट्रपति ट्रम्प प्रशासनले ल्याएको थियो ।

ट्रम्प अमेरिकाको राष्ट्रपतिमा निर्वाचित भएपछि यो नीति आएकोमा अन्तर्राष्ट्रिय रूपमा व्यापक मात्रामा आलोचना भएको थियो ।

अमेरिकी राष्ट्रपति ट्रम्पले आप्रवासीका आफ्ना परिवारका सदस्य र बालबालिकालाई पनि साथैमा रहन अनुमति दिने आदेश दिएपछि यस नयाँ नीतिसँगै पेन्टागनको यो निर्णय आएको छ ।