कुनै बेला तरलता समस्याले बैंक तथा बित्तिय संस्थाहरुलाई हैरान पारे पनि पछिल्ला दिनमा अधिक तरलता हुन थालेको छ ।

नेपाल राष्ट्र बैंकका अनुसार बैंकिङ प्रणालीमा ७७ अर्ब रुपैयाँ अधिक तरलता देखिएको छ । प्रणालीमा तरलता बढिरहँदा सरकारी कोष एक खर्ब ३९ अर्ब रुपैयाँले बचतमा देखिएको राष्ट्र बैंकले जनाएको छ । प्रणालीमा अधिक तरलता आएपछि बैंकहरुबीच हुने आपसी सापटी दर २ प्रतिशत हाराहारीमा झरेको राष्ट्र बैंकका कार्यकारी निर्देशक नरबहादुर थापाले जानकारी दिए ।

‘बैंकहरुमा अधिक तरलता थुप्रिन थालेपछि राष्ट्र बैंकले त्यसलाई तान्न निक्षेप तथा अन्य मौद्रिक औजार प्रयोग गर्न थालेको छ ।’ कार्यकारी निर्देशक थापाले भने, ‘यसरी निक्षेप तान्दा प्रणालीमा अधिक तरलता कम हुन्छ र अन्तर बैंक ब्याज दर बढ्नेछ ।’

औषत सिसिडी रेसियो ७४–७५ प्रतिशतमा झरेको बैंकरहरु बताउँछन् । विगतमा तरलता अभाव हुँदा बैंकहरुले ऋण दिन सकेका थिएनन् । अहिले २८ बाणिज्य बैंकको कर्जा–पूँजी–निक्षेप अनुपात (सिसिडी रेसियो) सहज अवस्थामा आएको छ ।