नुवाकोटस्थित शिवपुरी गाउँपालिका–१ का अनन्तराम केसीले ९० घन्टा दुई मिनेट निरन्तर वक्तव्य दिएर विश्वकीर्तिमान कायम गरेका छन् ।

भदौ ११ गते बिहान ६ बजेदेखि बिहीबार मध्यरातसम्म निरन्तर वक्तव्य दिएर उनले सो कीर्तिमान कायम गरेका हुन् । केसीले भारत केरेलाका केपी भाल साराजानकोे ८१ घन्टा १६ मिनेट बोलेर कायम गरेकोे विश्वकीर्तिमानलाई समेत तोडेका छन् ।

न्यु माइन्ड्स एकेडेमीको आयोजनामा केसीले गोकर्णेश्वर नगरपालिका–५ जोरपाटीस्थित इस्टपोल स्कुलमा केसीले सो वक्तव्य दिएका हुन् । राष्ट्रिय गौरवसँग जोडिएको यो अभियानलाई पूरा गर्न केसीले उभिएर तथा बसेर वक्तव्य दिएको न्यु माइन्ड्स एकेडेमीका अध्यक्ष कुमारराज सुवेदीले जानकारी दिए ।

निरन्तर ९० घन्टा दुई मिनेट बोलेर विश्वकीर्तिमान राखेका उनलाई गिनिज बुक अफ वल्र्ड रेकर्डका प्रतिनिधि सोप्निल डांगारीकार, प्रदेश सांसद जीवन डंगोलले संयुक्त रूपमा प्रमाणपत्र वितरण गरेका हुन् ।

नेपालको ७७ वटै जिल्ला र भारतको ६ प्रान्त गरी १२ हजार पाँच सय किलोमिटर पैदलयात्रा गरिसकेका केसी एक आध्यामिक साधक पनि हुन् केसीले २१ दिन जल उपवास र ६ महिना मौन ध्यान साधना पूरा गरिसकेका छन् । केसीले यसअघि ८० घन्टा लगातार वक्तव्य दिएर पनि प्राविधिक कारणले गिनिज बुक अफ वल्र्ड रेकर्डमा नाम लेखाउन सकेका थिएनन् ।