जापानका प्रमुख तेल आयातकर्ताले अक्टोबरमा इरानबाट कच्चा तेलको आयात स्थगन गर्ने तयारी गरेको स्थानीय सञ्चारमाध्यमले जनाएका छन् । अमेरिकाले इरानी कच्चा तेल आयात गर्ने मुलुकमाथि नै प्रतिबन्ध लगाउने धम्की दिएलगत्तै यस्तो तयारी गरेको बताइएको छ ।

अमेरिकी राष्ट्रपति डोनाल्ड ट्रम्पले इरानसँग सम्पन्न सन् २०१५ को आणविक सम्झौताबाट अमेरिका बाहिरिने र इरानसँग व्यापार गर्नबाट अरू मुलुकलाई पनि रोक्ने गरी गत महिना नयाँ प्रतिबन्ध घोषणा गरेका थिए ।

इरानको कच्चा तेल उद्योग र बैंकिङ क्षेत्रमाथि लक्षित गरी दोस्रो चरणका प्रतिबन्ध आगामी नोभेम्बर ५ देखि कार्यान्वयन गर्ने अमेरिकी भनाइ छ ।

‘जापानले इरानी तेल आयातलाई निरन्तरता दिने योजना अघि सारेको भए पनि त्यो सम्भव भएन,’ जीजी प्रेस र अरू सञ्चारमाध्यमले जनाएका छन् । परिणामस्वरूप, जापानी तेल कम्पनीहरू इरानी कच्चा तेलको आयात रोक्ने तयारीमा लागेका हुन् । उनीहरू बजारको मागलाई सम्बोधन गर्न नयाँ गन्तव्यको खोजीमा लागेका छन् ।

व्यापार मन्त्रालयका एकजना अधिकारीले इरानी तेल खरिद गर्नेबारे अमेरिकासँग छलफल गरेको, तर कुनै प्रगति हुन नसकेको बताए ।

‘हामीले सरकारको निर्णयको प्रतीक्षा गरेका थियौँ, तर अहिल्यै सबै कुरा सार्वजनिक गर्ने अवस्थामा हामी छैनौँ,’ तेलको थोकबिक्रेता कम्पनी शोवा शेल सेकियुका प्रवक्ताले बताए ।

अर्को थोकबिक्रेता कम्पनी जेएक्सटीजीले पनि तेल आयातबारे टिप्पणी गर्न अस्वीकार गरेको छ ।

जापानमा तेलको आयात मुख्य रूपमा मध्यपूर्वबाट हुने गरेको छ । गत वर्ष जापानको कुल आयातको ५.३ प्रतिशत कच्चा तेल इरानबाट आयात भएको थियो ।