म्यासेडोनियाका मतदाताले ग्रिससँग दशकौँदेखि रहेको विवाद सुल्झाउँदै आफ्नो मुलुकको नाम परिवर्तन गर्ने पक्षमा मतदान गरेका छन् । आइतबारको जनमतसंग्र्रहमा न्यून मतदान भए पनि बहुसंख्यक मतदाताले अलग्गै नाम राख्ने प्रस्तावमाथि मतदान गरेका थिए । यो मतदानसँगै म्यासेडोनियालाई नेटो र युरोपेली युनियनको सदस्यता प्राप्त गर्ने बाटो खुलेको छ ।

निर्वाचन आयोगका अनुसार मुलुकका ९३ प्रतिशत मतदानस्थलको मतगणना गर्दा ९१.३ प्रतिशतले म्यासेडोनियाको नाम उत्तरी म्यासेडोनिया राख्न सहमति जनाएका छन् । नाम परिवर्तन गर्नुहुँदैन भन्ने पक्षमा केबल ५.७ प्रतिशत मत आएको थियो ।

म्यासेडोनियाका १८ लाख मतदातामध्ये करिब एकतिहाइले मात्र मतदान गरेका थिए ।

मतदानको परिणाम सार्वजनिक भएसँगै ग्रिसको विदेश मन्त्रालयले जारी गरेको विज्ञप्तिमा ग्रिस गत जुन महिनामा म्यासेडोनियासँग भएको सम्झौताप्रति प्रतिबद्ध रहेको बताएको छ । नाम परिवर्तन गरेमा म्यासेडोनियालाई नेटो र युरोपेली युनियनको सदस्यताका लागि सहयोग गर्ने ग्रिसले यसअघि नै प्रतिबद्धता व्यक्त गरिसकेको छ ।

ग्रिसका प्रधानमन्त्री अलेक्सिस चिप्रासले म्यासेडोनियाका समकक्षीलाई टेलिफोन गरी सम्झौताको कार्यान्वयनलाई निष्कर्षमा पु¥याउन म्यासेडोनियाका प्रधानमन्त्रीको साहस र प्रतिबद्धताको प्रशंसा गरे ।

अब म्यासेडोनियाको नाम परिवर्तनका लागि संसदको दुईतिहाइ मत आवश्यक पर्नेछ । साथै, यसलाई ग्रिसको संसदले समेत अनुमोदन गर्नुपर्नेछ ।