युवा तथा खेलकुदमन्त्री जगतबहादुर सुनार (विश्वकर्मा)को अध्यक्षतामा बसेको राष्ट्रिय खेलकुद परिषद्को बोर्ड बैठकले आठौँ राष्ट्रिय खेलकुद प्रतियोगिताको मिति दुई महिना पछि सारेको छ । उक्त बोर्ड बैठकले आगामी माघ २५ देखि फागुन ३ गतेसम्म आठौँ राष्ट्रिय प्रतियोगिताको नयाँ मिति पनि तोकेको छ । नुवाकोटको ककनीमा दुई दिनसम्म बसेको राखेपको बोर्ड बैठकले उक्त निर्णय गरेको हो ।

यसअघि आठौँ राष्ट्रिय प्रतियोगिता मंसिर २१ देखि २८ गतेसम्म मध्यपश्चिमाञ्चलको नेपालगञ्जमा आयोजना हुने निर्णय गरेको थियो । आठौँ राष्ट्रिय प्रतियोगिता तोकिएकै मितिमा गर्न सकिने भए पनि राष्ट्रिय प्रतियोगिताको स्तरीयतालाई मध्यनजर राख्दै मिति सारिएको राखेप स्रोतले जनाएको छ । अहिले तोकिएकै समयमा राष्ट्रिय प्रतियोगिताको आयोजना गर्न विशेष तयारी भए पनि त्यो प्रतियोगिताको लागि तोकिएको समय अपुरो हुने देखिएकोले बोर्ड बैठकले यस्तो निर्णय गरेको बुझिएको छ ।

प्राप्त जानकारीअनुसार दुई महिना पछि सार्दा राष्ट्रिय प्रतियोगिता स्तरीय रूपमा आयोजना हुने र यसले राष्ट्रिय प्रतियोगिताको औचित्य पनि पुष्टि गर्ने राखेप जनाएको छ । साथै भौतिक पूर्वाधारकोे निर्माणमा देखिएको कमी–कमजोरीलाई पनि दुई महिनाको समयले पूर्णता दिने स्रोतले जनाएको छ । साथै बैठकले आठौँ राष्ट्रिय खेलकुदका लागि विभिन्न उपसमिति पनि गठन गरेको छ ।