नेपाल व्यायाम मन्दिरका मिलन सिजापतीले १३औँ धर्मश्री विजेता तथा ५०औँ एसियन च्याम्पियनसिपका स्वर्ण पदकधारी महेश्वर महर्जनललाई पछाडि पार्दै १५औँ धर्मश्रीबाट सुशोभित भएका छन् । ८० केजीमाथिको तौलमा प्रतिस्पर्धा गरेका सिजापतीले विजयपश्चात् नगद ५ लाखसहित ब्यानेट तथा ट्रफी प्राप्त गरेका थिए ।

दोस्रो भएका ८० केजी तौल समूहका सेप फिटनेसका महेश्वरले नगद २ लाखसहित मेडल, ट्रफी तथा प्रमाणपत्र प्राप्त गरे । तेस्रो स्थानमा ६५ केजी तौल समूहका नेपाल व्यायाम मन्दिरका रामबहादुर दाहाल रहे । उनले नगद १ लाखसहित मेडल तथा प्रमाण पत्र प्राप्त गरेका थिए ।

नेपाल व्यायाम मन्दिरद्वारा आयोजित धर्मश्री प्रतियोगितामा चौथो स्थानमा सेप टु ढल्कोका प्रवेश श्रेष्ठ रहे । उनले नगद ९० हजारसहित ट्रफी प्राप्त गरे । उनी ७५ केजी तौल समूहमा प्रथम हुँदै धर्मश्रीका लागि छनोट भएका थिए । यस्तै, पाँचौँ स्थानमा ७० केजी तौल समूहका नेपाल व्यायाम मन्दिरका सञ्जीव श्रेष्ठ रहे । उनले नगद ८० हजारसहित ट्रफी प्राप्त गरे । छैटौँस्थानमा रहेका ६० केजी तौल समूहका व्यायाम मन्दिरका आशिष देवाजुले नगद ७५ हजार ट्रफी प्राप्त गरे । यस्तै, सातौँ स्थानमा ५५ केजीका व्यायाम मन्दिरका सुरेश खत्री रहे । उनले नगद ६० हजारसहित ट्रफी प्राप्त गरे ।

कमलादीस्थित नेपाल प्रज्ञा प्रतिष्ठानमा भएको प्रतियोगिताको ५५ केजी तौलमा उज्ज्वल जिम तथा जुम्बाका किसन दास दिवाकर दोस्रो र मसल मेनियाका अवाज प्याकुरेल तेस्रो भए । सर्वाधिक पुरस्कार राशिको प्रतियोगितामा ६० केजी तौल समूहमा फिटनेस स्टुडियोका गौरभप्रसाद श्रेष्ठ र नेपाल व्यायाम मन्दिरका सुजन तामाङ दोस्रो र तेस्रो भए ।

६५ केजी तौल समूहमा फिटनेस फस्र्टका रोजिन बज्राचार्यले दोस्रो स्थान प्राप्त गरे । यस्तै, फिटनेस स्टुडियोका सुपेन डंगोलले तेस्रो स्थान हात पारे । ७० केजी तौलमा अक्सफोर्ड जिमका समीर श्रेष्ठले रजत पदक पाए । यसैगरी सेप टु ढल्कोका उज्ज्वलराज बज्राचार्यले कास्यमा चित्त बुझाए । प्रतियोगिताको ७५ केजी तौलमा ग्यालेक्सी फिटनेसका ललित धिमाल दोस्रो र रिभर फिल्ड फिटनेसका अशोक महर्जन तेस्रो भए । ८० केजी तौलको समूहमा फिटनेस स्टुडियोका प्रवीन शाहीले रजत र सेप टु ढल्कोका विशाल कँडेलले कांस्य प्राप्त गरेका थिए ।

यसैगरी ८० केजीमाथिको हेभिवेटमा नेपाल व्यायाम मन्दिरका ग्रिस महर्जनले रजत पाए भने कम्पिल्टी हेल्थ क्लबका अनोज मास्केले कांस्यमा चित्त बुझाए । सो तौल समूहमा दोस्रो तथा तेस्रो हुनेले क्रमशः नगद ३० र २० हजार, मेडल तथा प्रमाणप्रत्र प्राप्त गरेका थिए ।

विजयी खेलाडीलाई उपराष्ट्रपति नन्दकिशोर पुन पासाङ, पूर्वरक्षामन्त्री तथा सांसद भीमसेनदास प्रधानलगायतले पुरस्कार वितरण गरेका थिए ।

०४२ सालमा १५ हजार पुरस्कार राशिबाट शुरु गरिएको धर्मश्री प्रतियोगिता १५औँ संस्करणसम्म आइपुग्दा शारीरिक सुगठनमा सर्वाधिक धनराशि पुरस्कार रहेको प्रतियोगिता भएको छ ।