नेपाली कम्युनिस्ट आन्दोलनका संस्थापक पुष्पलाल श्रेष्ठको सम्झनामा नेपाल खेलकुद महासंघअन्तर्गत राष्ट्रिय ब्याडमिन्टन संघको आयोजनामा आठौँ पुष्पलाल स्मृति राष्ट्रिय ब्याडमिन्टन प्रतियोगिता कात्तिक २७ गतेबाट काठमाडौंमा हुने भएको छ । ०६८ सालबाट ऱ्याङकिङ प्रतियोगिताबाट शुरु गरिएको प्रतियोगिता आठौँ संस्करणसम्म आइपुगेको हो ।

त्रिपुरेश्वरस्थित राखेप कभर्डहलमा हुने प्रतियोगिताामा पुरुष तथा महिला एकल तथा युगल, यू– १७ छात्र तथा छात्रा एकल र भेट्रान्स (४५ वर्षमाथि) जोडी गरी ७ विधामा प्रतिस्पर्धा हुने संघका अध्यक्ष वीरेन्द्र श्रेष्ठले जानकारी गराए ।

करिब १२ लाख लागतको अनुमानित बजेट रहेको प्रतियोगितामा पुरुष–महिला एकलमा शीर्ष तीन स्थान हात पार्नेले मेडल, ट्रफी प्रमाणपत्रका साथै नगद ५० हजार, २५ हजार र १० हजार, युगलतर्फ २०, १० र ५ हजार प्राप्त गर्नेछन् । यस्तै यू– १७ तर्फ छात्र तथा छात्रा दुवैतर्फ पहिलो, दोस्रो र तेस्रो हुनेले क्रमशः १५ हजार, ७ हजार र ५–५ हजारसहित मेडल, प्रमाणपत्र, ट्रफी प्राप्त गर्ने छन् । यसैगरी भेट्रान्सतर्फ विजयी शीर्ष तीन स्थानकाले मेडल, ट्रफी तथा प्रमाणपत्रका साथै खेलकुद सामग्री प्राप्त गर्ने अध्यक्ष श्रेष्ठले बताए ।

नेपाल ब्याडमिन्टन संघको प्राविधिक सहयोगमा हुने प्रतियोगितामा करिब दुई सय खेलाडीले सहभागिता जनाउने आयोजकले जनाएका छन् ।

प्रतियोगिताको सातौँ संस्करणमा पुरुष एकलमा सेनाका रत्नजित तामाङ, महिलातर्फ पूर्वाञ्चलकी जेसिका गुरुङ, पुरुष युगलतर्फ सेनाका रत्नजित तामाङ र नवीन श्रेष्ठको जोडी तथा महिलातर्फ नङशल तामाङ र अनु राईको जोडी विजयी भएका थिए । यस्तै यू–१७ मा छात्रतर्फ सेनाका प्रफुल महर्जन र छात्रातर्फ पूर्वाञ्चलकी जेसिकाले बाजी मारेका थिए । यस्तै भेट्रान्सतर्फ धनकुटाका योगश्वर श्रेष्ठ र किरण प्रधानको जोडी पहिलो स्थान प्राप्त गर्न सफल भएको थियो ।