सिंगापुरमा आयोजना हुने फिना वर्ल्ड कप २०१८ मा सहभागी हुन जाने नेपाली पौडी टोलीलाई नेपाल पौडी संघका महासचिव जगतमान श्रेष्ठले बिदाइ गरेका छन् ।

यही नोभेम्बर १५ देखि १७ सम्म आयोजना हुने प्रतियोगितामा खेलाडीतर्फ डुवाना लामा, उपास्ती महर्जन तथा साइद हम्जा शाह, प्रशिक्षकमा रत्नलाल महर्जन तथा व्यवस्थापकमा विष्णु खड्का रहेका छन् ।

प्रतियोगितामा डुवाना र उपास्तीले ५० मिटर फ्रिस्टायल र ५० र १०० मिटर बेस्ट स्ट्रोक तथा शाहले ५० मिटर फ्रिस्टायल, ५० र १०० मिटर बेस्ट स्ट्रोक तथा ५० र १०० मिटर बटरफ्लाईमा प्रतिस्पर्धा गर्नेछन् । सबै खेलाडीहरूको पहिलो अन्तर्राष्ट्रिय सहभागिता हो ।

बिदाइ कार्यक्रममा नेपाल पौडी संघका सचिव एवं वरिष्ठ प्रशिक्षक ईश्वर कार्की, पूर्व प्रमुख प्रशिक्षक वाङदेन लामा र प्रमुख प्रशिक्षक शंकर कार्कीको पनि उपस्थिति रहेको थियो । टोलीलाई बिदाइ गर्दै महासचिव श्रेष्ठले उत्कृष्ट सफलता हात पार्न शुभकामना दिए ।

यस प्रतियोगितामा नेपाली खेलाडीले आफ्नो व्यक्तिगत समयमा सुधार गर्ने र आगामी दिनमा हुने आठौँ राष्ट्रिय खेलकुद प्रतियोगिता तथा १३औँ दक्षिण एसियाली खेलकुदमा राम्रो नतिजा प्राप्त गर्न सफल हुने प्रमुख प्रशिक्षक शंकर कार्कीले बताए । नेपाली टोली आइतबार नै त्यसतर्फ प्रस्थान गर्ने कार्यक्रम रहेको छ ।