सन १९८८ को २४औँ सिउल ओलम्पिकमा उत्कृष्ट प्रदर्शन गर्दै नेपाललाई पहिलोपटक ओलम्पिक पदक दिलाएका चर्चित तेक्वान्दो खेलाडी विधान लामा सम्मानित भएका छन् । लामालाई राष्ट्रिय तेक्वान्दो संघ नेपालले आफ्नै केन्द्रीय कार्यालय सानोभ¥याङमा आयोजित कार्यक्रममा सम्मानित गरेको हो ।

लामालाई तेक्वान्दो खेलमार्फत नेपालको मान, सम्मान र प्रतिष्ठा अन्तर्राष्ट्रियस्तरमा बढाएको र नेपाललाई ओलम्पिक र एसियाली खेलकुद प्रतियोगितामा पदक दिलाएका कारण राष्ट्रिय तेक्वान्दो संघले सम्मान गरेको हो । लामालाई संघका अध्यक्ष तथा नेपाल खेलकुद महासंघका अध्यक्ष शिव कोइराला ज्वालाले सम्मानपत्र प्रदान गर्दै सम्मान गरेका थिए । लामा एसियाली र ओलम्पिक खेलमा तेक्वान्दोमा अन्तर्राष्ट्रिय पदक जित्ने पहिलो कीर्तिमानी नेपाली खेलाडी हुन् ।

उक्त सम्मान कार्यक्रममा राष्ट्रिय तेक्वान्दो संघका वरिष्ट उपाध्यक्ष एकनाथ थापा, उपाध्यक्ष तथा तेक्वान्दो पूर्व मुख्य प्रशिक्षक ध्रुवबहादुर गुरुङ, महासचिव राजकुमार कार्की, सचिव राकेश श्रेष्ठ, राखेप कानुनी शाखाका अधिकृत नारायणराज अर्याल र तेक्वान्दो प्रशिक्षक र खेलाडीको उपस्थिति रहेको थियो ।

सो अवसरमा उपाध्यक्ष थापाले लामाले तेक्वान्दो खेलमा पु¥याएको योगदानको चर्चा गरेका थिए । त्यस्तै संघका अध्यक्ष ज्वालाले तेक्वान्दो खेलको सर्वाधिक सफल खेलाडी विधान लामालाई सम्मान गर्न पाउँदा खुसी प्रकट गरेका थिए । देशकाल र परिस्थितिले वर्तमान अवस्थामा तेक्वान्दोले सोचेको जस्तो सफलता हासिल गर्न नसकेको कुरामा प्रकाश पार्दै केहि महिनापश्चात् नै तेक्वान्दो आफ्नो लिकमा आउने विश्वास प्रकट गरेका थिए । आफू तेक्वान्दोमा विवाद होइन विकास गर्न आएको भन्दै तेक्वान्दो समग्र विकासको लागि आफूले जस्तोसुकै त्याग गर्न सक्ने बताए ।

त्यस्तै सम्मानित खेलाडी लामाले तेक्वान्दो फुटेको होइन जुटेको आफूले देख्न चाहेको बताए । लामाले दुवै संघ मिलेर अगाडि बढे नेपालले पहिलोको भन्दा पनि राम्रो नतिजा ल्याउन सक्ने बताए । साथै राष्ट्रिय तेक्वान्दो संघले सम्मान गरेकोमा धन्यवाद दिँदै आभार प्रकट गरेका थिए ।