दुई वर्षको अवधिमा बाग्लुङमा १८९ महिला तथा बालबालिका हराएका छन् ।

जिल्ला प्रहरी कार्यालयका अनुसार आर्थिक वर्ष ०७३–७४ मा ८६ महिला २४ बालबालिका हराएका छन् । त्यसैगरी आव ०७४–७५ मा ६७ महिलासहित १२ बालबालिका हराएका प्रहरीको तथ्यांकले देखाएको छ ।

जिल्ला प्रहरी कार्यालयका प्रमुख एवं प्रहरी उपरीक्षक दीपक रेग्मीका अनुसार जिल्लाको तथ्यांक हेर्दा महिला तथा बालबालिका हराउने क्रम आव ०७३–७४ मा बढे पनि ०७४–७५ मा भने घटेको छ । हराउनेमध्ये केहीले भागेर आफैँ बिहे गर्ने तथा सानै उमेरमा बिहे गरेर भारततिर गएको हुन सक्ने प्रहरीले जनाएको छ । छिमेकी देश भारतको खुला सीमा र बढ्दो सामाजिक सञ्जालको प्रयोगसँगै महिला तथा बालबालिका हराउन थालेको रेग्मीको भनाइ छ ।

‘सामाजिक सञ्जालको दुरुपयोग बढ्दो छ,’ रेग्मीले भने, ‘महिला तथा बालबालिका विभिन्न प्रलोभनमा परी परिवारबाट सम्पर्कविहीन हुने गरेका छन् ।’ प्रहरीको अध्ययनअनुसार हराएका महिला तथा बालबालिका कतिपय अवैध कार्यमा समेत संलग्न भएको पाइएको छ ।

आव ०७३–७४ मा हराएका ११० मध्ये ३५ महिला र १८ बालबालिका र आव ०७४–७५ हराएका ७९ मध्ये २८ महिला र ६ बालबालिका घरपरिवारको सम्पर्कमा आएका छन् । यस्तै चालू आवको अहिलेसम्मको अवधिमा हराएका २४ मध्ये ६ महिला तथा तीन बालबालिका परिवारको सम्पर्कमा आएका छन् । हराएपछि खोजबिनका लागि प्रहरीलाई खबर गरे पनि फेला परेपछि धेरैले जानकारी नगराएकाले फेला पर्नेको यकिन तथ्यांक नआउने प्रहरीले जनाएको छ ।