यातायातको पहुँचमा पुगेका नेपाली जनताले पछिल्ला दिनमा ‘यमराज’को संज्ञा दिएका ‘टिपर’को लापर्वाहीका कारण आज फेरि अर्का एक नागरिकको अकालमै ज्यान गएको छ । साँझको बेला अनियन्त्रित तवरले हुँइकिएको बा ४ ख ८१८२ नम्बरको टिपरले भक्तपुर चाँगाथलीका मनोज थापा मगरको ज्यान लिएको हो ।

मोटरसाइकलमा सवार मनोजलाई बुधबार साँझ (करिव आठ बजेको समयमा) टिपरले धक्का दिएलगत्तै उनको घटनास्थलमै मृत्यु भएको छ भने उनका भाइ मनिष थापा मगर घाइते भएका छन् ।

घटनापछि आक्रोशित स्थानीय (बालकोटवासी)बाट जोगाउन प्रहरीले टिपरलाई विशेष सुरक्षा दिएका छन् । घटनास्थल प्रधानमन्त्री केपी शर्मा ओलीको निवासको एक–डेढ किलोमिटर पेरिफेरिमा पर्छ ।