मानव अपहरण गरेर बन्दी तुल्याई भारत लगेर बिक्री गर्न खोजेको अवस्थामा पक्राउ परेका तर पछि फरार भएका अभियुक्तलाई बारा प्रहरीले १४ वर्षपछि पक्राउ गरेको छ । पक्राउ पर्नेहरूमा गजिन्द्र राय, शिवधारी महरालगायत रहेका छन् ।

अभियुक्तहरूले बारा झिटकैयाका शिवशंकर साह तेलीलाई भारत लगेर बिक्री गर्नकै लागि बन्धक बनाएर विहार पूर्वी चम्पारण महुअवा थानाअन्तर्गत चनरमन गाउँका सुरेन्द्र्र बरैको घरमा बन्धक बनाएर राखेका थिए ।

सो अवस्थामा ०६२ वैशाख ११ का दिन भारतीय प्रहरीको सहयोग लिएर नेपाल प्रहरीले शिवशंकरलाई सकुशल उद्दार गरेको थियो । तर कानुनी कारवाहीको प्रक्रिया चल्दै गर्दा अभियुक्तहरु भागेका थिए ।

फरार भएको १४ वर्षपछि गत मंगलबार बारा प्रहरीले आ–आफ्नै घरमा लुकी बसेको अवस्थामा अभियुक्तहरुलाई पक्राउ गरेको हो । उनीहरुलाई अदालतमा पेस गरी सजाय कटाउन पर्सा कारागार चलान गरिएको प्रहरीले जनाएको छ ।