राष्ट्रिय खेलकुद परिषद्अन्तर्गत राष्ट्रिय टिम तयारी समितिले नेपालमा हुने १३औँ दक्षिण एसियाली खेलकुद (साग) लाई लक्षित गरी खेलाडीको विशेष प्रशिक्षण शुरु गरेको छ । हाललाई इन्डोनेसियामा सम्पन्न १८औँ एसियाली खेलकुदका पदक विजेतासहित उत्कृष्ट प्रदर्शन गर्ने खेलाडीलाई विशेष प्रशिक्षणमा सामेल गरिएको छ ।

१८औँ एसियाडमा नेपालले सहभागिता जनाएको २९ खेलमध्ये भारोत्तोलन, बक्सिङ, आर्चरी, सुटिङ, एथलेटिक्स, टेबलटेनिस, कराते, ब्याडमिन्टन, तेक्वान्दो, पौडी, जुडो, उसु र प्याराग्लाइडिङ गरी १३ खेलका ४३ खेलाडीलाई विशेष प्रशिक्षणमा सहभागी गराइएको छ । १८औँ एसियाडमा प्याराग्लाइडिङबाहेक अन्य खेलका खेलाडीले पदक जित्न असफल भए पनि उनीहरूले गरेकोे उत्कृष्ट प्रदर्शनको आधारमा खेलाडी छनोट गरिएको तयारी समितिले जनाएको छ ।

प्याराग्लाइडिङले पुरुष टिम क्रसकन्ट्रीमा नेपाललाई रजत दिलाएको थियो । उक्त पदक नेपालले १८औँ एसियाडमा हासिल गरेको एक मात्र पदक थियो । विमल अधिकारी, विजय गौतम, सुशील गुरुङ, युकेश गुरुङ र विशाल थापा सम्मिलित टोलीले रजत जितेको थियो ।

माघ ५ गतेसम्म चल्ने प्रशिक्षण मङ्सिर २५ गतेदेखि सुरु भए पनि औपचारिक उद्घाटन भने मङ्सिर २९ गते शनिबार मात्र गरिएको हो । राखेपका सदस्यसचिव केशवकुमार विष्टले प्रशिक्षणको एक कार्यक्रमबीच उद्घाटन गरेका थिए । प्रशिक्षणको जिम्मेवारी सम्बन्धित १३ खेलका १६ प्रशिक्षकलाई दिइएको छ । कार्यक्रमलाई सम्बोधन गर्दै सदस्यसचिव विष्टले पदक ल्याउन असफल भए पनि उत्कृष्ट प्रदर्शन गर्ने खेलाडीलाई १३औँ सागको तयारीलाई मध्यनजर गरी विशेष प्रशिक्षणको व्यवस्था मिलाइएको जानकारी गराए ।

‘राष्ट्रलाई पदक दिलाउने खेलाडीलाई त हामीले नगदसहित सम्मान गरिसकेका छौँ । पदक विजेतासहित पदक जित्न असफल भए पनि आ–आफ्नो विधामा उत्कृष्ट प्रदर्शन गरेका खेलाडीको सम्मानका खातिर र १३औँ सागको तयारीलाई लक्षित गरी हामीले विशेष प्रशिक्षणको थालनी गरेका हौँ,’ सदस्यसचिव विष्टले भने । विष्टले प्रशिक्षकको हकमा सिनियर, जुनियर, स्थायी, अस्थायी नहेरी राम्रो र सक्षम प्रशिक्षकलाई प्रशिक्षणको जिम्मेवारी दिएको बताउदै बाँकी खेलाडीलाई आठौँ राष्ट्रिय खेलकुदपछि प्रशिक्षणमा राखिने बताए ।

राष्ट्रिय टिम तयारीका निर्देशक अर्जुन विकले पहिले तोकिएको मितिभन्दा आठौँ राष्ट्रिय खेलकुद पछि सरेकोले तत्काललाई १८औँ एसियाडमा उत्कृष्ट प्रदर्शन गर्ने खेलाडीलाई मात्र समावेश गरी तालिम सुरु गरिएको बताए । कार्यक्रममा विशेष प्रशिक्षणमा सहभागी खेलाडी र प्रशिक्षकलाई सदस्यसचिव विष्टले ट्र्याकसुट प्रदान गरेका थिए ।