नेपाल राष्ट्रिय तथा अन्तर्राष्ट्रिय खेलाडी संघको आयोजनामा यसै महिना हुने उत्कृष्ट खेलाडी सम्मान कार्यक्रममा सर्वोत्कृष्ट घोषित हुने एक महिला र एक पुरुष खेलाडीले जनही एक लाख पुरस्कार पाउने भएका छन् ।

अघिल्लो वर्षका प्रतियोगिताहरूमा गरेको प्रदर्शनका आधारमा सर्वोत्कृष्ट खेलाडीको घोषणा गरिने संघले जनाएको छ । संघका अनुसार सर्वोत्कृष्ट हुने पुरुष र महिला खेलाडीलाई प्रदान गरिने पुरस्कार यस वर्षदेखि जनता बैंकले उपलब्ध गराउने भएको छ ।

सम्झौताअनुसार बैंकले आगामी पाँच वर्षसम्म संघलाई सर्वोत्कृष्ट खेलाडी पुरस्कारका लागि प्रतिवर्ष दुई लाख रुपैयाँ उपलब्ध गराउनेछ ।

बैंकका तर्फबाट सहायक प्रमुख कार्यकारी अधिकृत अजय मिश्र र खेलाडी संघका तर्फबाट अध्यक्ष दीपक श्रेष्ठले सम्झौतापत्रमा आज (आइतबार) हस्ताक्षर गरेका छन् । सम्झौताअनुसार बैंकले आगामी पाँच वर्षसम्म संघलाई सर्वोत्कृष्ट खेलाडी पुरस्कारका लागि रु. दुई लाख उपलब्ध गराउनेछ ।

सो अवसरमा अध्यक्ष श्रेष्ठले बैंकको यो सहकार्यबाट खेलाडीहरूलाई विशेष प्रोत्साहन मिलेको बताए । अन्तर्राष्ट्रिय जगतमा देशको नाम उच्च राख्न पसिना बगाउने खेलाडीलाई प्रोत्साहित गर्ने उद्देश्यमा संघले लामो समयदेखि वर्ष खेलाडी सम्मान कार्यक्रम आयोजना गर्दै आएको छ ।