तेह्रथुमको फेदाप गाउँपालिका–२, ओयाक्जुङ घर भई हाल दुबई जेलमा रहेका खड्गबहादुर जोगीलाई स्वदेश फर्काउन ५५ लाख रुपैयाँ जम्मा भएको छ ।
जोगी बचाउ अभियानका अनुसार उनलाई स्वदेश फर्काउन आवश्यक पर्ने ‘ब्लडमनि’ रु. ६२ लाख करिब–करिब जम्मा भइसकेको छ । हालसम्म नेपाल बैंकको खातामा ५५ लाखभन्दा बढी रकम जम्मा भएको र अझै देश विदेशमा जम्मा भएको रकम आउन बाँकी रहेकाले स्वदेश फर्काउन आवश्यक रकम संकलन भइसकेको अभियानले जनाएको छ । जोगीलाई स्वदेश फर्काउन समाजसेवी राधिका पोखरेलले एक लाख रुपैयाँ प्रदान गरेकी छिन् ।
यस्तै युवटुवर भाग्य न्यौपानेले पनि जोगीबारे भिडियो बनाई सहयोग संकलन गरी १० लाख रुपैयाँ हस्तान्तरण गरे । जोगी ०७० सालमा युएई गएका आफूसँगै काम गर्ने फिलिपिनी नागरिकको हत्या आरोपमा चार वर्षदेखि जेल सजाय भोगिरहेका छन् ।
परिवारका अनुसार २०१४ मे ६ मा खड्गबहादुरसँगै काम गर्ने फिलिपिन्सका नागरिक गाडीबाट खसेका थिए । साथी गाडीबाट खसेपछि उनले कम्पनीमा खबर गरे । कम्पनीकै गाडीमा राखेर अस्पताल पु¥याउँदा साथीको मृत्यु भएको थियो । फिलिपिनी साथीको मृत्यु भएकै दिन प्रहरीले खड्गबहादुरलाई अनुसन्धानका लागि पक्राउ गरेको थियो । खड्गबहादुरलाई अदालतले पाँच वर्ष कैद र रु. दुई लाख जरिवाना तिर्नुपर्ने फैसला गरेको छ ।
प्रतिक्रिया