रामेपाछको लिखु तामाकोसी गाउँपालिकाको अवरोधका कारण अवरुद्ध २८.१ मेगावाटको तल्लो लिखु जलविद्युत आयोजनाको निर्माण सुचारु भएको छ । गत पुस १७ गतेबाट रोकिएको आयोजनाको निर्माण १३ दिनपछि आइतबारबाट सुचारु भएको हो ।
आयोजना प्रभावित स्थानीय वडाका जनप्रतिनिधि र स्थानीय जनताबीच ४ बुँदे सहमितपछि आयोजनाको निर्माण पूर्णरूपमा सुचारु भएको स्वेतगंगा हाइड्रो पावर कम्पनीका संचालक सुवर्णदास श्रेष्ठले बताए । उनका अनुसार स्थानीय जनताको पहलमा आयोजनाको निर्माणले पुन गति लिएको छ ।
यसअघि गाउँपालिकाका अध्यक्ष गोविन्द खड्काको निर्देशनमा गत पुस १७ गतेदेखि आयोजनाको निर्माण ठप्प पारिएको थियो । अध्यक्ष खड्काले प्रवर्द्धक कम्पनी समक्ष गाउँपालिकाका लागि अस्पताल निर्माण, निशुल्क सेयर र विद्युतको माग राखेका थिए । गाउँपालिकाको माग बमोजिमका सर्त पूरा गर्न नसकिने बताएपछि आयोजनाको काम रोकिएको श्रेष्ठले बताए । ‘पुस १६ गते आयोजनाको क्रसर रोक्नु भन्ने निर्देशन आयो,’ उनले भने,‘ १७ र १८ गते आयोजनाको संरचना निर्माणको काम रोक्न भनियो र हामीले काम रोक्यौं ।’ आयोजना अघि बढाउन स्थानीय जनताको पूर्ण साथ र समर्थन भए पनि स्थानीय निकायबाट अवरोध हुनु दुखःद भएको उनले गुनासो गरे ।
सरकासँग अनुमति लिएर निर्माण अघि बढाइएका आयोजनामा अवरोध हुनुले सरकारको १० वर्षमा १५ हजारको सीमा पूरा हुन नसक्ने पनि उनले बताए । विद्यमान कानुनी प्रावधान अनुसार वातावरणीय प्रभाव मुल्याङ्कन प्रतिवेदनमा उल्लेखित स्थानीय पूर्वाधार विकासमा छुट्याइएको रकम कम्पनीले खर्च गर्ने उनको भनाइ छ । ‘हामीले स्थानीय पूर्वाधार विकासको क्षेत्रमा खर्च गर्ने रकमको विवरण सरोकारवालालाई पारदर्शीरुपमा बुझाएका छौं,’ उनले भने, ‘२ गाउँपालिकाको ६ वडाका प्रतिनिधिको प्रस्ताव गर्ने पूर्वाधार विकासमा रकम खर्च हुनेछ । ’
स्थानीय पूर्वाधार विकासका आयोजनाबारे जानकारी दिन कम्पनीले आगामी माघ १२ गते सर्वसाधारणको भेला आयोजना गर्ने भएको छ । भेलामा प्रभावित वडाका प्रतिनिधिले तयार पारेका पूर्वाधार विकासको योजना सार्वजनिक गरिने भएको छ । आयोजना निर्माण गर्न प्रयोग हुने ढुंगा, गिटी, बालुवाको राजश्व गाउँपालिकामा बुझाउने दस्तुर तोक्न आग्रह गरे पनि अहिलेसम्म कार्यान्वयन नभएको कम्पनीले जनाएको छ । गाउँपालिकामा गत असार २६ गते दस्तुर रोक्न कम्पनीले आवेदन दिएको थियो । आयोजना रामेछाप र ओखलढुंगाको सीमामा पर्दछ । रामेछापको लिखु तामाकोसी र ओखलढुंगाको लिखु गाउँपालिकाका ६ वडा आयोजनाबाट प्रभावित छन् । चालु वर्षबाट निर्माण सुरु भएको आयोजना २०७८ मा सम्पन्न गरेर विद्युत उत्पादन गर्ने लक्ष्य छ ।
प्रतिक्रिया