उवर, टुटल, पठाओलगायतका मोबाइल एप्स सञ्चालन गरी त्यसको माध्यमबाट सम्पर्कमा आएका व्यक्तिलाई ‘यात्रु सेवा’ प्रदान गर्ने मोटरसाइकलहरू ट्राफिक प्रहरीको निशानामा परेका छन् । उक्त कार्यलाई नियमविपरीत भन्दै महानगरीय ट्राफिक प्रहरी महाशाखाले यात्रु बोक्ने मोटरसाइकललाई कारबाही शुरु गरेको छ ।

यातायात व्यवस्था ऐनअनुसार निजी सवारीसाधनले पैसा लिएर यात्रु बोक्न पाइँदैन । यातायात व्यवस्था ऐन २०४९ को दफा ८ को उपदफा १ बमोजिम दर्ता भएका सवारीसाधनले उपदफा २ बमोजिम निजी सवारी साधन यातायातका लागि प्रयोग गर्न नपाइने व्यवस्था छ । यही ऐनलाई आधार बनाएर ट्राफिक प्रहरीले यात्रु बोकेर सेवा प्रदान गर्दै आएका चारवटा मोटरसाइकललाई कारबाही गरेको छ ।

महाशाखाले बा.२६ ९९४६, बा.३५प ८०३४, बा.९३ प ८५१९, लु.२०प ७६३४ र प्रदेश ३–०२–००३ प ६५८२ नम्बरको मोटरसाइकलका चालकलाई कारबाही गरिएको जनाएको छ । महाशाखाका प्रमुख एसएसपी वसन्त पन्तले निजी सवारीसाधनले पैसा लिएर यात्रु बोक्न नपाइने भएकाले कारबाही गरिएको तर्क दिए । कारबाही गरिएका मोटरसाइकलचालकलाई एक हजारसम्म जरिवाना गरिएको उनको भनाइ छ ।

यसरी भाडामा यात्रु बोक्ने मोटरसाइकल धेरै रहेका भन्दै महाशाखाले यस्ता सवारीसाधनमाथि विशेष कारबाही अभियान शुरु गरेको जनाएको छ । ट्राफिक प्रहरीको यस अभियानमा नेपाल मिटर ट्याक्सी सङ्घले समेत समर्थन जनाएको बुझिन्छ । निजी सवारीसाधनले यात्रु बोक्दा सार्वजनिक सवारीसाधनलाई समस्या परेको सो सङ्घको बुझाइ छ । मोटरसाइकलले यात्रु बोकिदिएपछि आफ्नो आम्दानीमा धक्का पुग्ने ट्याक्सी व्यवसायीको बुझाइका आधारमा उनीहरूले प्रहरीको उक्त कदमको समर्थन गरेका हुन् ।

ज्ञात रहोस्, इमर्जेन्सीको अवस्थामा ट्याक्सीले अनावश्यक ‘बार्गेनिङ’ गरेर यात्रुलाई ठग्न खोज्ने गुनासो बढेपछि मोटरसाइकलबाटै यात्रुलाई सेवा प्रदान गर्ने व्यवसाय सञ्चालनमा आएको थियो । यो सेवाबाट खासगरी साँझ या रातको समयमा मदिरा सेवन गर्नेहरूले विशेष लाभ उठाउने गरेका चर्चा सुनिन थालिएको थियो । यसरी मापसे गर्नेहरूले ‘सुविधा’ लिएको चर्चा चुलिएपछि ट्राफिक प्रहरीले यात्रु बोक्ने मोटरसाइकलमाथि कारबाही शुरु गरेको बुझिएको छ ।