संयुक्त अरब इमिरेट्स (यूएई) भ्रमणमा रहेको नेपाललाई आज (शुक्रबार) हुने घरेलु टोलीविरुद्धको दोस्रो टी–२० क्रिकेट जित्नैपर्ने दबाब रहेको छ ।

तीन खेलको टी–२० शृंखलाअन्तर्गत नेपालले बिहीबार भएको पहिलो खेल गुमाइसकेको छ । नेपाललाई शृंखला आफ्नो पक्षमा पार्न आजको दोस्रो खेल जित्नैपर्ने दबाब छ ।

आजको खेल जित्न सके नेपालले शृंखला जित्ने सम्भावना कायम रहनेछ भने यूएईले जिते एक खेलअगावै शृंखला आफ्नो पक्षमा पार्नेछ । एकदिवसीय शृंखला गुमाइसकेको घरेलु टोली यूएईका लागि टि–२० शृंखला जित्न गर या मरको अवस्थामा छ ।

पहिलो खेल गुमाएर पनि पछिल्ला दुई खेल जितेर एकदिवसीय शृंखलामा कब्जा जमाउन सफल नेपाल उच्च मनोबलका साथ मैदान उत्रनेछ । दुबईस्थित आईसीसी ग्लोबल क्रिकेट एकेडेमीको मैदानमा नेपाल र युएईबीचको खेल नेपाली समयअनुसार दिउँसो २ः४५ बजे शुरु हुनेछ । घरेलु टोलीविरुद्धको दोस्रो खेलका लागि मैदानमा उत्रँदा नेपाल शृंखला जोगाउने लक्ष्यमा हुनेछ ।

पहिलो टी–२० खेलमा २१ रनले पराजित नेपाल दोस्रो खेलमा जित निकाल्दै तीन खेलको शृंखला एक–एक जितको बराबरी गर्न चाहन्छ तर, घरेलु टोलीविरुद्ध नेपाललाई जीत निकाल्न निकै कठिन हुनेछ ।

टी–२० विश्वकपमा प्रतिस्पर्धा गरिसकेको नेपालले अहिलेसम्म टी–२० शृंखला जित्न सकेको छैन । शृंखला जिते यसपटक नेपालले अर्को इतिहास रच्नेछ । नेपालले हालसम्म दुई टी–२० अन्तर्राष्ट्रिय शृंखला खेलिसकेको छ । बंगलादेशमा सम्पन्न सन् २०१४ को टी–२० विश्वकप खेलेको नेपालले त्यही वर्ष हङकङसँग श्रीलंकामा पहिलोपटक पाँच खेलको शृंखला खेलेको थियो । तर, उक्त शृंखलाका चार खेल वर्षाको कारण रद्द भएका थिए । अन्तिम खेलमा भने नेपाल हङकङसँग दुई विकेटले पराजित भएको थियो ।

यस्तै, नेपालले सन् २०१५ मा नेदरल्यान्डसविरुद्ध चार खेलको टी–२० शृंखला खेलेको थियो । जसमा नेपालले शृंखला तीन–एकले गुमाएको थियो । पहिलो रोजाइका ब्याट्सम्यानले रन बनाउन नसक्दा बिहीबारको खेलमा पराजित हुनुपरेको बताउँदै नेपाली टोलीका कप्तान पारस खड्काले बिहीबारको गल्ती सच्याउँदै आज मैदान उत्रने बताए ।

‘नेपालका शीर्ष क्रमका कुनै पनि ब्याट्सम्यानले विजयी इनिङ खेल्न सकेनन् । सन्दीप जोराले एक्लै ५३ रन बनाउँदा नेपालका शीर्ष पाँच ब्याट्सम्यानले बनाएको कुल रन ४० मात्र रह्यो,’ खड्काको भनाइ थियो ।

एकदिवसीय शृंखलामा पनि नेपालले पहिलो खेल गुमाएको थियो भने पछिल्ला दुई खेलमा उत्कृष्ट प्रदर्शन गर्दै शृंखला आफ्नो पक्षमा पारेको थियो ।