उच्च शिक्षालय तथा माध्यमिक विद्यालय संघ नेपाल (हिसान) को संयोजन तथा हिसान काठमाडौं जिल्ला कार्यसमितिको आयोजनामा चौथो हिसान उपत्यकाव्यापी खेलकुद सप्ताह माघ २४ गते बिहीबारदेखि शुरु भएको छ ।

प्रतियोगितामा फुटसल, बास्केटबल, भलिबल, टेबलटेनिस र टग अफ वारमा प्रतिस्पर्धा हुने खेलकुद सप्ताहका संयोजक रामहरि सिलवालले आयोजित पत्रकार सम्मेलनमा जानकारी गराए ।

माकलबारीमा हुने फुटसलको छात्रमा २५ र छात्रामा ७ टिम सहभागी हुनेछन् । बसुन्धरास्थित ऋत एकेडेमीमा हुने बास्केटबलको छात्रमा २५ र छात्रामा ८ तथा नेसनल मावि, बालकुमारीमा हुने भलिबलको छात्रमा १८ र छात्रामा १० टिमको सहभागिता रहनेछ ।

नयाँ बानेश्वरको प्रिमियर कलेजमा हुने टेबलटेनिसमा ४० प्रतिस्पर्धीले भाग लिने बताइएको छ । टेबलटेनिसमा छात्र–छात्रा सिंगल्स र डबल्स स्पर्धा समावेश छन् । प्रिमियरमै हुने टग अफ वारमा २२ टिमले सहभागिताका लागि नाम दर्ता गराएका छन् ।

खेलकुद सप्ताह सञ्चालनका लागि करिब १५ लाख रुपैयाँ खर्च हुने हिसानका केन्द्रीय अध्यक्ष रमेश सिलवालले जानकारी गराए । ‘पहिलो मित्रता अनि प्रतिस्पर्धा’ भन्ने नाराका साथ हुन लागेको खेलकुद सप्ताहकै दौरान कविता, वक्तृत्वकला र हाजिरीजवाफ पनि हुने आयोजकले जनाएको छ ।