हालै संयुक्त अरब इमिरेट (युएई) मा सम्पन्न टी–२० क्रिकेटमा ‘म्यान अफ दी सिरिज’ को उपाधि जित्न सफल अभिनाश बोहरालाई उनको गृहनगर नेपालगञ्जमा भव्य स्वागत गरिएको छ । बोहरालाई स्वागत गर्ने क्रममा नगर परिक्रमा पनि गराइएको थियो ।

बाँके जिल्ला क्रिकेट संघको अगुवाइमा पुष्पलाल चोकबाट शुरु भएको नगरपरिक्रमा धम्बोझी, बीपी चोक हुँदै त्रिभुवन चोकमा पुगेर समापन भएको क्रिकेट संघका बाँकेका अध्यक्ष दुर्गाबहादुर थापामगरले जानकारी गराएका छन् ।

सम्मान तथा स्वागत कार्यक्रममा बाँकेका खेलप्रेमी, समाजसेवी, खेलाडी नगरवासीहरूको उल्लेख्य सहभागी रहेको थियो । सम्मान कार्यक्रममा प्रदेश सांसद सुरेन्द्र हमालले आफू पनि पूर्वखेलाडी भएकोले खेलाडीको समस्यामा सधैँ हातेमालो गरेर अगाडि जाने बताए ।

कार्यक्रम नेपालगञ्ज उपमहानगरपालिकाकाका उपप्रमुख उमा थापामगरले नगरपालिकाको तर्फबाट पनि बोहरालाई सम्मान कार्यक्रमको आयोजना गर्ने बताइन् । थापामगरले अहिले कार्यविधि निर्माणको क्रममा रहेकाले छिटै सम्मानको कार्यक्रम राख्ने बताइन् ।

बाँके जिल्ला क्रिकेट संघका अध्यक्ष दुर्गा थापामगरको सभापतित्वमा भएको कार्यक्रममा क्यानका केन्द्रीय सदस्य सञ्जयराज सिंह, खेल खेलकुद विकास समिति अध्यक्ष आतंक बस्नेत, प्रशिक्षक दीपेन्द्रप्रताप सिंहलगायतको सहभागी रहेको थियो ।

बोहरा पहिलोमा १, दोस्रोमा ३ र तेस्रो खेलमा २ विकेट लिँदै डेब्यु खेलमै ६ विकेट लिएर ‘म्यान अफ दी सिरिज’ घोषित भएका थिए । बोहराले बाँके जिल्लाको हुँदै मध्यपश्चिमको प्रतिनिधित्व गरेर थुप्रै राष्ट्रिय प्रतियोगिता खेलेका छन् । बोहरा स्थानीय नेपाल टाइगर क्रिकेट क्लबबाट खेल्दै आएका छन् ।