भारतका लागि नेपाली राजदूत निलाम्बर आचार्यले नेपाल–भारत प्रबुद्ध व्यक्ति समूह (इपिजी) गठन भइ द्विपक्षीय सम्बन्धमा गहन प्रतिवेदन तयार हुनु सबैभन्दा ठूलो उपलब्धि भएको धारणा सार्वजनिक गरेका छन् ।

शुक्रबार आयोजित साक्षात्कार कार्यक्रममा राजदूत आचार्यले विगतका कुराबाट दुवै देशले पाठ सिकेर अघि बढ्नुपर्ने बताए । विगतका विभिन्न राजनीतिक दलका प्रतिनिधि नेपालमा प्रधानमन्त्री हुँदा भारत र नेपालबीच कस्तो सम्बन्ध थियो र अब कस्तो सम्बन्ध हुनुपर्छ भन्ने प्रतिवेदन नै इपिजी प्रतिवेदन हो भन्दै उनले प्रतिवेदन आइसकेपछि कसरी कार्यान्वयन गर्ने भन्ने कुरा दुई देशका सरकारमा निर्भर रहने प्रष्ट्याए ।

इपिजीको प्रतिवेदन अलपत्र नै पो पर्ने हो कि भन्ने प्रश्नमा उनले गोलमटोल जवाफ दिए । प्रतिवेदन अलपत्र परिरहेकोबारे कुनै प्रष्ट धारणा दिनुको साटो ‘अब दुवै देशले शङ्काबाट नभई धैर्यतापूर्वक अघि बढ्नुपर्ने बेला आएको’ जवाफ दिएर उनी पन्छिए ।