घोराही उपमहानगरपालिकास्थित जयशेर माध्यमिक विद्यालय रावतगाउँमा प्राविधिक शिक्षा सञ्चालनका लागि आयोजना गरिएको श्रीमद्भागवत धनधान्याञ्चल विराट् नवाह ज्ञान महायज्ञमा रु. ९० लाखभन्दा बढी दान संकलन भएको छ । महायज्ञको अन्तिम दिनसम्म रु. ९० लाख दान संकलन भएको आर्थिक समितिले जानकारी दिएको छ ।
महायज्ञमा हिजो मंगलबार एकै परिवारले रु. २० लाखभन्दा बढी दान गरेका छन् । महायज्ञका निर्देशक रेखबहादुर वलीका अनुसार घोराही उपमहानगरपालिका–६ कम्दानिवासी घनश्याम वलीका परिवारले रु. २० लाख ११ हजार १११ दान गरेका हुन् ।
ठूलो रकम दान दिनेहरूमा घोराही उपमहानगरपालिका–६ बचानिवासी केशव महराले रु. ६ लाख ८० हजार, चोरगाउँनिवासी जगवीर चौधरीले रु. पाँच लाख ६१ हजार, पन्नेपुरनिवासी चूर्णबहादुर वलीले रु. दुई लाख ७१ हजार पाँच, वडा नं. ७ निवासी रेवतादेवी योगी र छोरा वलदेव योगीले रु. तीन लाख एक हजार १०५ रहेको छ । वडा नं. १६ सर्रा निवासी प्रवीण भण्डारी र आमा बोधादेवी भण्डारीले रु. दुई लाख पाँच हजार ५५५ र बाँके जिल्ला कोहलपुरनिवासी प्रमोद श्रेष्ठ र मीना श्रेष्ठले रु. एक लाख १६ हजार १११ दान दिएको समितिले जनाएको छ । महायज्ञमा मुख्यवाचक पण्डित अमृतशरण देवाचार्य रहेका छन् ।
विद्यालयको उद्देश्य प्राप्तिका लागि महायज्ञमा सक्दो सहयोग गर्न महायज्ञका निर्देशक रेखबहादुर वलीले सबैमा अनुरोध गरेका छन् । यही माघ २२ गतेदेखि शुरु भएको महायज्ञको आज (बुधबार) समापन हँुदै छ ।
प्रतिक्रिया