झापाको दमकमा कभर्ड हल निर्माणका लागि जमिन प्रदान गर्ने नेपाल प्रहरीका पूर्वअतिरिक्त प्रहरी महानिरीक्षक (एआईजी) तथा हक्कीका पूर्वखेलाडी अमरसिंह शाहलाई खेलकुद विकास समिति झापाले फागुन १ गते बुधबार सम्मान गरेको छ ।

खेलकुद विकास समितिले एक विशेष कार्यक्रमको आयोजना गर्दै दमक नगरपालिका– ९ निवासी जग्गादाता अमरसिंह शाहलाई खादा लगाएर सम्मान गरेको हो । नेपाल प्रहरीका पूर्वअतिरिक्त प्रहरी महानिरीक्षक (एआईजी) तथा हक्कीका पूर्वखेलाडीसमेत हुन् ।
शाहलाई खेलकुद विकास समितिका अध्यक्ष शंकर थापा, नेपाल हक्की संघका सचिव रञ्जन थापा, प्रशिक्षण प्रमुख टार्जन सुब्बा, कार्यालय प्रमुख टहलदास मैनाली, खेल प्रशिक्षक, पत्रकारलगायतको खादा लगाएर सम्मान गरेका थिए ।

राष्ट्रिय खेलकुद परिषदले खेलकुद विकास समितिमार्फत दमकमा कभर्ड हल निर्माणका लागि बजेट निकासा गरेपछि शाहले दमक ९ मा १० कट्ठा जमिन खेलकुदका लागि निःशुल्क प्रदान गरेका हुन् ।

बहुवर्षीय योजनाअन्तर्गत रहेको कभर्ड हल निर्माणका लागि परिषदले चालू आर्थिक वर्षमा ५० लाख रुपैयाँ विनियोजन गरेपछि केन्द्र प्रसाईंको नेतृत्वमा नारायण ज्योति बहुउद्देश्य कभर्ड हल निर्माण उपभोक्ता समिति गठन गरिसकेको छ ।