भारतको उत्तराखण्डस्थित ऋषिकेशमा आयोजित ‘पाटा एडभेन्चर ट्राभल एण्ड रेस्पोंसिबल टुरिजम कन्फेरेन्स एण्ड मार्टु’मा नेपालको साहसिक तथा अध्यात्मिक पर्यटन प्रवद्र्धन गरिएको छ । प्यासिफिक एशिया ट्राभल एशोसिएसन (पाटा) ले यही फागुन १, २ र ३ गते सम्म आयोजना गरेको उक्त मार्टमा पाटा नेपाल च्याप्टर र नेपाल पर्यटन बोर्डको सहकार्यमा नेपालका छ निजी पर्यटन व्यावसायिक संस्थाले सहभागिता जनाएका थिए ।

कैलाश ग्रुप नेपाल, केजीएच ग्रुप अफ होटेल एण्ड रिसोर्ट, हिमालयन होलिडेज, कम्युनिटी होमस्टे, नेपाली घर होटेल र अभिवादन एक्सपीडिसन होलिडेजले प्रभावकारी सहभागिता जनाएका हुन् । उत्तराखण्ड टुरिजम डेभलपमेन्ट बोर्डको आतिथ्यतामा आयोजित उक्त मार्टमा २८ वटा विभिन्न मुलुकबाट सरकारी तथा निजी क्षेत्र सम्बद्ध ३०० सहभागी थिए । जसमा नेपाल, भारत, भूटान, म्यान्मा, इण्डोनेसिया, मलेसिया, थाइल्याण्डलगायत १० वटा गन्तव्य देशबाट ४७ बिक्रेता र अस्ट्रेलिया, क्यानडा, चीन, कोरिया, स्पेन, युके, अमेरिकालगायत १८ वटा विभिन्न स्रोतबजारबाट ४४ क्रेतको उल्लेख्य सहभागिता रहेको थियो ।

‘रेजुभने युवर सोउल थ्रु ट्राभल’ मूल विषयमा केन्द्रित एकदिने कन्फेरेन्समा ‘स्टोरी टेलिङ टु सेल ट्राभल अन इन्स्टाग्राम, टूल फर रेजुभनेशनु, र ‘भिजन ड्रिभन लिडरशिप इन एडभेन्चर टुरिजम’लगायत विविध शीर्षकमा वक्ताले आआफ्नो प्रस्तुति दिएका थिए । बोर्डका बजार व्यवस्थापक श्रद्धा श्रेष्ठले नेपालको प्रतिनिधित्व गरेका थिए । पाटा नेपालका अध्यक्ष सुनिल शाक्यले नेपाल, भारत र भूटानको दिगो तथा जिम्मेवार पर्यटन विकासका लागि तीनै राष्ट्रबीच संयुक्त पहल र सहकार्यका लागि पाटाअन्तर्गत आवश्यक पहल गर्नुपर्ने धारणा राखेका थिए ।

मार्टमा नेपालको आध्यात्मिक तथा धार्मिक पर्यटन सम्बन्धित प्रोडक्ट र सम्भावनालाई स्थानीय एवं विदेशी सहभागीमाझ प्रवद्र्धन तथा उजागर गर्ने उपयुक्त माध्यम बनेको पाटा नेपाल च्याप्टरका प्रमुख कार्यकारी अधिकृत सुरेशसिंह बुडालले बताए । योग क्यापिटलका रुपमा सुप्रशिद्ध ऋषिकेशमा वार्षिक ३५ लाख श्रद्धालु तथा पर्यटकले भ्रमण गर्ने गर्दछन् ।