ललितपुर जिल्ला अदालतले गोदामचौर बलात्कार घटनाका तीन अभियुक्तलाई जनही दश वर्ष कैद सजाय हुने फैसला गरेको छ । सामूहिक बलात्कारको घटनाका अभियुक्त रघु सिलवाल, विशालध्वज कार्की र पवन कुँवरलाई न्यायाधीश धनसिंह महराको इजलासले दोषी ठहर गर्दै जनही दश वर्ष कैद सजायको फैसला सुनाएको हो ।

ललितपुर जिल्ला अदालतका स्रेस्तेदार चन्द्रप्रकाश तिवारीका अनुसार गोदावरी नगरपालिका–१ गोदामचौरमा २०७४ साल मङ्सिर २ गते सामूहिक बलात्कारमा परेकी गोदामचौरकी २१ वर्षीया युवतीको मुद्दाको सुनुवाइपछि सो फैसला सुनाइएको होे ।

दोषीलाई कैद सजाय मात्र नभई ज्यान मार्ने अभियोगमा उनीहरुबाट पीडितलाई जनही एक लाख क्षतिपूर्ति भराउनुपर्ने फैसला समेत अदालतले गरेको छ ।

सामूहिक बलात्कारपछि ज्यान मार्ने मनसायले युवतीको टाउकोमा ढुङ्गा प्रहार गरेको अनुमान गरी फालेका थिए । युवतीलाई बेहोस भएको अवस्थामा घटना भएको भोलिपल्ट तोरीबारीमा भेटिएको थियो । युवतीले घटनाअघि नै अभियुक्तहरुको अनुहार चिनेको हुँदा तीनै जनाविरुद्ध किटानी जाहेरी दिएकी थिइन् ।