ग्यास उद्योगीको मागप्रति सरकार लचिलो बनेपछि उद्योगीले हड्ताल कार्यक्रम स्थगित गरेका छन् । ग्यास उद्योगीले १० बुँदे माग राख्दै हड्तालको घोषणा गरेका थिए । उद्योगीले शुक्रबारदेखि ग्यास खरीद समेत रोकेका थिए । तर माग सम्बोधनका लागि निगमका कार्यकारी निर्देशक सुरेन्द्र पौडेल र संघका अध्यक्ष गोकुल भण्डारीसहितको टोलीबीच वार्ता भएको थियो ।

उद्योग, वाणिज्यमन्त्री मातृका यादबको उपस्थितीमा नेपाल आयल निगम र ग्यास उद्योग संघबीच भएको वार्तामा उद्योगीको मागका बारेमा अध्ययन गर्न गठित समितिले १६ दिनभित्र सुझाब दिने र त्यही सुझाबका आधारमा माग पूरा गर्ने सहमति भएपछि हड्तालका कार्यक्रम स्थगित भएको हो ।

वार्तामा पेट्रोलियम पदार्थको व्यवस्थापन र समग्र सुधारको मार्गचित्र तयार गर्न उच्चस्तरीय समिति गठन गर्ने समेत सहमति भएको बुझिएको छ । ग्यासको कमिसन बढाउनुपर्ने तथा नेपाली ग्यास उद्योगको नेपाली नम्बरका निजी बुलेट सञ्चालन गर्न पाउनुपर्ने माग राख्दै आन्दोलनमा उत्रिएका थिए ।