१५ पन्ध्र वर्षअघिदेखि साहित्यिक कर्ममा लागेका लमजुङका सर्जक किरण बरालको पहिलो आधुनिक गीतहरूको सङ्ग्रह ‘सार्थक’भित्र समेटिएको ‘तिमीस“ग नजिक भएर…’ बोलको गीतको म्युजिक भिडियो सार्वजनिक भएको छ । गायक स्वरूपराज आचार्यको स्वरमा समेटिएको उक्त गीतमा बीबी अनुरागीले सङ्गीत भरेका छन् भने शब्द किरण बरालको रहेको छ ।
उपत्यकाको विभिन्न मनोरम स्थलहरूमा छायाङ्कन गरिएको यस गीतको भिडियोमा अहिलेका चर्चित मोडल नीराजन प्रधान र बेनिशा हमालले अभिनय गरेका छन् । हरि हुमागाईंको छायाङ्कन र निसान घिमिरेको सम्पादन रहेको उक्त भिडियोमा गीतको भावअनुसारको विषयवस्तुलाई समेत निकै आकर्षक ढङ्गबाट प्रस्तुत गरिएको निर्देशक विशाल भण्डारीले बताए । म्युजिक भिडियोमा कथावस्तुलाई भन्दा विशुद्ध प्रस्तुतिलाई मात्र जोड दिने निर्देशक भण्डारीको यस भिडियो कथावस्तु प्रदान भए पनि दर्शकहरूबाट सकारात्मक प्रतिक्रिया प्राप्त भइरहेको जानकारी भण्डारीले दिए ।
लमजुङस्थित बेसीसहर नगरपालिका–५ भकुण्डे घर भई लामो समयदेखि गीत अनि गजल सर्जकका अलावा नाटक लेखन, निर्देशन, रेडियो कार्यक्रम सञ्चालन, स्तम्भलेखन, प्राध्यापन र बैंकिङ पेसामा समेत आबद्ध सर्जक बरालको यो गीतको म्युजिक भिडियोले छोटो समयमा नै यू ट्युवमा उल्लेख्य सङ्ख्यामा दर्शकको माया कमाइरहेको छ । एसियन म्युजिकले बजारमा ल्याउन लागेको उक्त एल्बम छिट्टै सार्वजनिक हुने सर्जक बरालले जानकारी दिए । उक्त एल्बममा स्वरूपराज आचार्यलगायत अहिलेका चर्चित साङ्गीतिक हस्तीहरू शिशिर योगी, अञ्जु पन्त, दिनेश गौतम, विमल पराजुलीको सुमधुर स्वर समेटिएको छ भने सङ्गीत बीबी अनुरागी, दीपक शर्मा, शिशिर योगी, पुस्तकप्रसाद र विमल पराजुलीको रहेको छ । एल्बम सार्थकभित्र समेटिएका सबै गीतमा सर्जक किरण बरालले शब्द रचना गरेका हुन् ।
प्रेम र विछोडको विषय मात्र नभएर यस एल्बममा कर्णालीका जनताको दुःखपीडालाई सरकारले सम्बोधन गर्न नसकेको कुरालाई समेत बेजोड ढङ्गले प्रस्तुत गरिएको ‘डोल्पाले चामल पा छैन’ गीत पनि समेटिएको छ जसमा शिशिर योगीको सुमधर स्वर एवम् सङ्गीत रहेको छ । सर्जक किरण बरालकी ममतामयी आमा स्वर्गीय राधा बरालको स्मृतिमा बजारमा आउन लागेको यस एल्बमका सम्पूर्ण गीतहरूको रेकर्डिङलगायतका प्राविधिक कामहरू पूरा भइसकेको र छिट्टै नै एल्बम सार्वजनिक गरिने कुरा एल्बमकी कार्यकारी निर्माता रश्मी बराल (घिमिरे)ले बताइन् ।