विप्लव नेतृत्वको नेकपाका सङ्खुवासभा जिल्ला इञ्चार्जसहित चार जना लाई जेल चलान गरिएको छ। सङ्खुवासभा इञ्चार्ज देव गुरुङ, जिल्ला सदस्य सुनिता राई, सुजन विक र सञ्जय तामाङलाई पुर्पक्षका लागि जेल चलान गरिएको जिल्ला अदालत चैनपुरका सूचना अधिकारी गोविन्द कार्कीले जानकारी दिएका हुन्। गत चैतमा काठमाडौंबाट पक्राउ गरी गुरुङलाई शंखुवासभा लगिएको थियो ।

इञ्चार्ज गुरुङ र सुनितालाई अरुण तेस्रो जलविद्युत् परियोजनामा विष्फोट गराएको आरोप लागेको छ भने अन्य दुई जनालाई हातहतियार खरखजना तथा सङ्गठित अपराधको मुद्दा लागेको थियो ।

अर्का जिल्ला सदस्य बुद्धिमान तामाङ पनि पक्राउ परेका र ४० हजार धरौटी बुझाउन नसकेकाले कारागार चलान भएको शंखुवासभा जिल्ला अदालतले जनाएको छ । बुद्धिमानलाई हातहतियार खरखजना तथा सङ्गठित अपराधको मुद्दा दर्ता भएको थियो ।

प्रहरीले अहिलेसम्म सङ्खुवासभाका विभिन्न स्थानबाट विप्लव नेकपाका नौ जना कार्यकर्ता पक्राउ गरेको छ ।