राष्ट्रिय खेलकुद परिषद्का सदस्यसचिव रमेशकुमार सिलवालले खेलकुदलाई विवादको थलो बनाउन खोज्ने विकृत तत्वलाई सबै मिलेर सामाजिक बाहिष्कार गर्नुपर्ने धारणा व्यक्त गरेका छन् । राखेप कर्मचारी संघले आयोजना गरेको स्वागत तथा विदाई कार्यक्रमका अवसरमा नवनियुक्त सदस्यसचिव सिलवालले सो धारणा राखेका हुन् ।

बिमा विनाको प्रतियोगिता नहुने जानकारी दिँदै सदस्यसचिव सिलवालले भने, ‘खेलाडी, प्रशिक्षक, अफिसियलको विमा नगरिएको प्रतियोगिता मान्य हुँदैन । चाहे त्यो राष्ट्रिय प्रतियोगिता होस् वा अन्य प्रतियोगिता । विमा गर्नैपर्छ ।’

उनले बाहिरबाट हायर गरिएका व्यक्तिले नभई परिषद्का कर्मचारी स्वयंले आफ्नो संस्थालाई मजबुत बनाउनुपर्ने सुझाव दिँदै आफ्नो कार्यकाल पारदर्शी, परिणाममुखी, स्वच्छ र अनुशासित हुने बताए । ‘यहाँ धेरै कर्मचारीसँग लामो समय काम गरेको अनुभव छ । हायर गरेको व्यक्तिले होइन तपाईंहरूले नै परिषद्लाई मजबुत बनाउने हो ।’ सदस्यसचिव सिलवालले भने– ‘मेरो कार्यकाल यस्तो हुन्छ भनेर भन्दिनँ, तर मेरो कार्यकाल पारदर्शी, परिणाममुखी, स्वच्छ, अनुशासित हुने विश्वास छ ।’

सोही अवसरमा राखेपका उपाध्यक्ष पिताम्बर तिम्सिनाले आफ्नो सिङ्गो अनुभव खेलकुदको विकासमा प्रयोग गर्ने बताउँदै वर्तमान सदस्यसचिवलाई खेलकुदको हितका निम्ति पूर्ण सहयोग गर्ने प्रतिबद्धता जनाए । निवर्तमान सदस्यसचिव विष्टले १३औँ दक्षिण एसियाली खेलकुद (साग) राष्ट्रकै प्रतिष्ठासँग जोडिएको विषय भएकाले समयमै हुनुपर्नेमा जोड दिँदै यस विषयमा वर्तमान सदस्यसचिव पनि सचेत रहेको बताए ।

नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले खेलकुदलाई माया गर्ने र खेलकुद बुझेको व्यक्तिलाई सदस्यसचिव बनाएर पठाएकोमा नेपाल सरकारलाई धन्यवाद दिए । उनले निवर्तमान सदस्यसचिव विष्टको कार्यकालमा पनि धेरै राम्रा कामहरू भएको बताए ।

राखेप कर्मचारी संघका अध्यक्ष रञ्जन थापाले लामो समयदेखि रोकिएको कर्मचारीहरुको बढुवाका लागि वर्तमान सदस्य–सचिवलाई पहल गरिदिन आग्रह गर्दै करार कर्मचारीहरुलाई स्थायी गर्ने विषयमा पनि गम्भीर हुन आवश्यक रहेको भनाई राखे ।

कार्यक्रममा कर्मचारी संघले निवर्तमान सदस्य–सचिव विष्टलाई खेलकुदको विकास र विस्तारमा योगदान पुऱ्याएवापत प्रशंसापत्र प्रदान गरी सम्मान गरेको थियो ।