नेपालका ठूला बैंकको एटिएम बुथको स्विच ह्याक गरी रकम चोरी गरेलगत्तै पक्राउ परेका चिनियाँ ह्याकरलाई नेपालस्थित चिनियाँ दूतावासका कर्मचारीले भेट गरेका छन् ।

एटिएम ह्याक गरी रकम चोरी गरेको विषयमा चिनियाँ दूतावासले चासो व्यक्त गरेको हो । पक्राउ परेका पाँच चिनियाँ नागरिकलाई भेट्न चिनियाँ दूतावासका कर्मचारी आइतबार साँझ महानगरीय प्रहरी परिसर काठमाडौं पुगेका थिए । महानगरीय प्रहरीका अनुसार नेपालस्थित चिनियाँ दूतावासका फस्ट सेक्रेटरी फिङसा ओलिन आएको जनाएको छ ।

प्रहरीका अनुसार उनिहरु बीच चिनियाँ भाषामा कुराकानी भएको र आपराधिक गिरोह हुन् भने अनुसन्धान राम्रोसँग गरिदिन दुतावासका कर्मचारी फिङसा ओलिनले प्रहरीसमक्ष आग्रह गरेका थिए ।

प्रहरीले चिनियाँ नागरिक ४० वर्षका लु जिया लिङ, ३५ वर्षका चेन विन विन, ३२ वर्षका झु लियाङ आङ, ३० वर्षका क्यु याङ यिङ र २९ वर्षका लिन जिनमिङलाई पक्राउ गरेको थियो ।