लमजुङको दोर्दी करिडोरमा निर्माणाधिन २७ मेगावाटको दोर्दीखोला जलविद्युत आयोजनाको मुख्य सुरुङको ‘ब्रेक थ्रु’ भएको छ । आयोजनाको निर्माणाधिन सुरुङ ढिलागरी ‘ब्रेक थ्रु’ भएको हो ।

प्रवद्र्धक कम्पनी हिमालयन पावर पार्टनरले निर्माण गरिरहेको उक्त आयोजनाको २ हजार ७ सय ८० मिटर सुरुङको ‘ब्रेक थ्रु’ गरिएको हो । ४ बर्षमा सुरुङ खन्ने कार्य सकिएसँगै आइतबार निर्माण कम्पनीका निर्देशक चन्द्र ढकाल, कार्यकारी निर्देशक गुरुप्रसाद ढकाल लगायतले सुरुङको ‘ब्रेक थु्र’ गरेका हुन् ।

आयोजनाको निर्माणकार्य २०७२ फागुनबाट थालेको थियो । सुरुमा इको इन्फ्रा बिल्डरले सुरुङ निर्माण थालेकोमा राम्रोसंग काम नगरेको भन्दै उक्त कम्पनीलाई हटाएर निर्माण कम्पनीले मल्टी इन्फ्रा स्ट्रक्चर डेभलपमेन्ट कम्पनीलाई भर्ना गरेको थियो । सुरुङ सुरु हुने ठाउँ (इनलेट) साविक चिति गाविस ४ रियाले र सुरुङ सकिने ठाउँ (आउटलेट) साविक चिती ७ रामचोकमा छ ।

हेडवक्र्सबाट इनलेटसम्म ३ हजार २ सय हेडरेस पाइपलाइन रहनेछ । यसको ६ सय मिटर जडान बाँकी रहेको छ । आउटलेटबाट पावर हाउससम्म ७ मिटरको पेनस्टक रहेको आयोजनाका इन्जिनियर दिपक ज्ञवाली बताउँछन् । आयोजनाका कार्यकारी निर्देशक गुरुप्रसाद ढकालले २०७२ बैशाख १२ गतेको भूकम्प, त्यसपछिको नाकाबन्दी, आयोजना क्षेत्रमा आउने बाढीपहिरो, सुरुङमा भेटिएको नरम चट्टान लगायतले आयोजनाको निर्माण कार्यमा ढिलाई भएको बताए ।

आयोजनाको दोर्दी गाउँपालिका ६ ढोडेनी, ७ फलेनी र ८ बन्सारबीच दोर्दीखोलामा हेडर्वक्स निर्माण गरिएको छ । बेंसीसहर ११ चितीको रामचोकबेंसीमा विद्युतगृह निर्माण गरिएको छ । आयोजनाको ८० प्रतिशत बढी निर्माण सकिएको आयोजनाका इन्जिनियर ज्ञवालीले बताए ।

९÷९ मेगावाट क्षमताका ३ वटा फ्रान्सिस टर्बाइन रहने विद्युतगृहको बाहिरी काम लगभग सकिएको आयोजनाले बताएको छ । आयोजनाको ग्रस हेड २ सय १२ मिटर छ । आयोजनाबाट १४७ दशमलव ६९ गिगावाट प्रतिघण्टा विद्युत् उत्पादन हुनेछ ।

नेपाल विद्युत प्राधिकरणलाई भने १४२ दशमलव ३१ गिगावाट प्रतिघन्टा विद्युत् बिक्री गर्ने प्रक्षेपण गरेको छ । आयोजनाले प्राधिकरणसँग चलनचल्तीको दरअनुसार हिउँद (सुक्खा याम) मा प्रतियुनिट ८ रुपैयाँ ४० पैसा र वर्षामा ४ रुपैयाँ ८० पैसामा विद्युत् खरिद–बिक्री सम्झौता (पीपीए) गरेको थियो । २०६९ असार १ गते पीपीए गरेको आयोजनाले २ वर्षपछि निर्माण थालेको थियो ।

४ अर्ब २३ करोड ३५ लाख रुपैयाँमा निर्माण पूरा गर्ने भनिएको उक्त आयोजनामा गैरआवासीय नेपालीद्वारा स्थापित एनआरएन इन्भेस्टमेन्ट लिमिटेडको ३५ दशमलव ७ प्रतिशत, आईएमई ग्रुपको ३४ दशमलव ३० प्रतिशत र स्थानीय र सर्वसाधारणको गरी ३० प्रतिशत लगानी छ । ३० प्रतिशतमा १० प्रतिशत स्थानीय र २० प्रतिशत सर्वसाधारणको सेयर छ । यसका लागि प्राइम कमर्सियल बैङ्कको अगुवाइमा ७ वटा वैक र एउटा जलविद्युत विकास तथा लगानी कम्पनीको बैङ्क तथा वित्तीय संस्थाको ७५ प्रतिशत ऋण र प्रवद्र्धकको ३५ प्रतिशत इक्विटी रहनेछ ।

किर्तिपुर–उदिपुर प्रसारण लाइन अन्योलमा

यता, आयोजनाको विद्युत कसरी राष्ट्रिय प्रणालीमा जोड्ने भन्ने विषय अन्योलमा छ । समयमा नेपाल विद्युत प्राधिकरणले किर्तिपुर–उदिपुर प्रसारण लाइन निर्माण नगर्दा आयोजनाको विद्युत खेर जाने हो की भन्ने शंका उब्जिन थालेको छ । यसैले पनि आयोजनाले निर्माणको गतिलाई बढाएको छैन् । प्रवद्र्धक कम्पनी आयोजना निर्माण भइरहँदासम्म किर्तिपुर–उदिपुर प्रसारण लाइन निर्माण नसकिए भुलभुले–मध्यमस्र्याङ्दी १३२ केभी प्रसारण लाइनमा उत्पादित विद्युत जोड्ने दाउमा छ ।